مصر هتصدر كهرباء لأوروبا.. تعاون مع اليونان هيقلب الموازين
يا ترى إيه تفاصيل اتفاق التعاون اللي مصر هاتعملوا مع اليونان؟ وإزاي مصر هتصدر الطاقة المتجددة لأوروبا؟ وتكون جزء من مشروع ضخم يربط بين مصر واليونان ويفتح أبواب السوق الأوروبية؟
في خطوة جديدة ومهمة.. مصر واليونان وقعوا مذكرة تفاهم للتعاون في مجال تخزين ثاني أكسيد الكربون والربط الكهربائي المعتمد على الطاقة المتجددة.
الوزير اليوناني للطاقة والبيئة أكد إن الاتفاق ده بيفتح فرص كبيرة للمستثمرين خصوصا مع إمكانية تصدير الكهرباء للسوق الأوروبية.
وقال ان التعاون ده مش بس هيفيد مصر واليونان.. ده كمان هيمتد تأثيره للاتحاد الأوروبي كله وبالأخص دول جنوب أوروبا.
وخد بالك الربط الكهربائي المعتمد على الطاقة المتجددة بين البلدين محتاج استثمارات ضخمة.. وده بيفتح الباب قدام القطاع الخاص إنه يشارك بقوة..و مصر عندها إمكانيات هائلة في الطاقة الشمسية والرياح والسوق الأوروبية جاهزة تستقبل الإنتاج ده.
وفي أكتوبر 2021 مصر واليونان وقعوا مذكرة تفاهم لبناء كابل كهربائي عملاق يربط بين البلدين.. وده كان أول اتفاق من نوعه بين أوروبا وأفريقيا في جنوب شرق البحر المتوسط.
المشروع ده اللي لسه في مرحلة الدراسة.. متوقع تكون قدرته 3 جيجاواط اليونان هتستخدم 1 جيجاواط والـ2 جيجاواط الباقيين هيتصدروا لدول أوروبية زي ألمانيا وإيطاليا.
الأزمة الحالية في أوروبا بسبب نقص إمدادات الغاز وارتفاع أسعاره خلتهم يدوروا على بدائل لتأمين الكهرباء زي التوسع في مشروعات الطاقة المتجددة والربط الكهربائي مع دول تانية.. وهنا بتيجي أهمية التعاون بين مصر واليونان اللي ممكن يكون حل جزئي للأزمة دي.
مصر اللي عندها فائض في إنتاج الكهرباء بيوصل لـ58 ألف ميجاواط يوميًا بينما الاستهلاك حوالي 33 ألف ميجاواط بدأت في 2020 محادثات لبيع الطاقة لأوروبا.. وده من خلال مناقشات مع اليونان وقبرص لبناء كابل تحت البحر يربط بين التلات دول.
الفرص الاستثمارية في المجال ده مش بس بتقتصر على إنتاج وتصدير الكهرباء لكن كمان في مجالات زي تخزين ثاني أكسيد الكربون وتطوير البنية التحتية للطاقة.
القطاع الخاص عنده فرصة ذهبية إنه يشارك في المشروعات دي خاصة مع وجود دعم حكومي وتشجيع من البلدين.. وبالإضافة لكده كمان انخفاض تكاليف تكنولوجيا الطاقة المتجددة،. زي الألواح الشمسية وأنظمة البطاريات بيساهم في جعل المشروعات دي أكثر جاذبية للمستثمرين.. وده بيفتح آفاق جديدة لزيادة حصة الطاقة المتجددة في السوق وتلبية احتياجات الطاقة بطرق مستدامة.
اللي لازم نعرفها ان التعاون بين مصر واليونان في مجال الطاقة المتجددة بيمثل فرصة استثمارية واعدة للقطاع الخاص.. السوق الأوروبية متعطشة لمصادر طاقة نظيفة ومستدامة.. ومصر عندها الإمكانيات لتلبية الاحتياج ده.
