تطورات مهمة في علاقة مصر بصندوق النقد.. ايه اللي بيحصل في الكواليس
يا ترى ليه صندوق النقد الدولى أعلن استمراره فى دعم مصر؟ ..و ايه الدعم اللى بيقدمه الصندوق لمصر ؟ وليه اصلا مصر بتحصل على دعم من الصندوق؟
في مؤتمر "العُلا لاقتصادات الأسواق الناشئة" بالسعودية كريستالينا جورجييفا، المديرة التنفيذية لصندوق النقد الدولي أعلنت إن الصندوق ملتزم بدعم الاقتصاد المصري خصوصا مع تنفيذ الحكومة المصرية للإصلاحات الاقتصادية المطلوبة.
المديرة التنفيذية لصندوق النقد الدولي قالت إن التقدم اللي بتحرزه مصر في الإصلاحات بيساهم في تعزيز المركز المالي للبلد.
طب هو إيه نوع الدعم اللي بيقدمه الصندوق لمصر؟
الدعم بيتمثل في تمويلات مالية وبرامج إصلاحية.. وفي ديسمبر اللي فات توصل الصندوق لاتفاق مع مصر بخصوص المراجعة الرابعة لبرنامج الدعم الموسع بقيمة 8 مليار دولار واللي بيسمح لمصر بالحصول على حوالي 1.2 مليار دولار بعد موافقة المجلس التنفيذي للصندوق.
كمان في إطار برنامج "الصلابة والاستدامة" مصر هتحصل على تمويل إضافي بقيمة 1.3 مليار دولار.. البرنامج ده بيهدف لتعزيز قدرة الاقتصاد المصري على مواجهة الصدمات ودعم الإصلاحات الهيكلية لتحقيق نمو اقتصادي مستدام.
وإيه أهمية الدعم ده لمصر؟
الدعم المالي بيساعد في توفير السيولة اللازمة لمواجهة التحديات الاقتصادية زي ارتفاع معدلات التضخم ونقص العملة الأجنبية.. كمان برامج الإصلاح الاقتصادي اللي بيشرف عليها الصندوق بتساهم في تحسين بيئة الاستثمار وتعزيز الثقة في الاقتصاد المصري.
على سبيل المثال.. التزام مصر بتنفيذ إصلاحات زي تحرير سعر الصرف والمضي قدمًا في برنامج الخصخصة بيساهم في تعزيز المركز المالي للبلد.. ومديرة صندوق النقد أشادت بالخطوات دي وأكدت إن كل ما مصر تقدمت في تنفيذ المطلوب كل ما مركزها المالي هيكون أقوى.
طب إيه التحديات اللي بتواجه مصر حاليًا؟
مصر بتمر بظروف اقتصادية صعبة نتيجة أحداث إقليمية زي تراجع إيرادات قناة السويس بسبب التوترات في المنطقة.. و ده أثر على تدفقات النقد الأجنبي وزود من التحديات الاقتصادية.. بالإضافة لكده.. ارتفاع معدلات التضخم ونقص العملة الأجنبية بيشكلوا ضغوط على الاقتصاد المصري.. وهنا بييجي دور الدعم الدولي، زي اللي بيقدمه صندوق النقد، في مساعدة مصر على تجاوز التحديات دي.
طب إيه الخطوات اللي جاية؟
فريق العمل المعني بمصر في صندوق النقد هيقدم المراجعة الجديدة لبرنامج هيكلة وتمويل الاقتصاد المصري لمجلس إدارة الصندوق قريبًا.. و المجلس هيناقش المراجعة وهيتخذ القرار المناسب بخصوص صرف الشريحة الجديدة من التمويل.
في النهاية استمرار دعم صندوق النقد الدولي لمصر بيعكس الثقة في قدرة الاقتصاد المصري على التعافي وتجاوز التحديات. ومع استمرار تنفيذ الإصلاحات المستقبل الاقتصادي لمصر بيبدو واعد واليام الجاية الامور هتتحسن بشكل كبير.
