تطور مهم في مورد دولاري مؤثر.. أخبار سارة للسياحة المصرية
يا ترى إيه سر تقدم مصر حوالي 22 مركز عالمي في مؤشر السياحة والسفر، هل في إجراءات جديدة اعتمدتها الحكومة عشان تحقق الهدف ده، ولا السياحة المصرية ماركة عالمية ودايما بتحقق تقدمات بدون أي مجهود، وإيه المنتظر في الفترة الجاية عشان نحقق تنمية سياحية متكاملة؟
في الفترة الأخيرة، الدولة عملت فوكس على القطاع السياحي، يعني أدته اهتمام كبير أوى، وده انعكس بشكل إيجابي على الإيرادات السياحية، اللي زادت عشان توصل ل 15.3 مليار دولار سنة 2024، مقابل 7.2 مليار دولار سنا 2014.
كمان، زادت أعداد السياح الوافدين بنسبة 59.6%، عشان توصل لرقم 15.8 مليون سائح في سنة 2024، مقابل 9.9 مليون سائح في سنة 2014، ومستهدف الوصول ل 30 مليون سائح بحلول ستة 2032 بحد أقصى.
وعشان الأسباب دي، فمصر اتقدمت 22 مركز في مؤشر تنمية السفر والسياحة، واحتلت المركز 61 في سنة 2024، مقابل المركز 83 في 2015، وذلك وفقا للمنتدى الاقتصادي العالمي.
والكلام ده بيؤكد إن في فرص نمو كبيرة في قطاع السياحي، وخاصة في الفترة الأخيرة اللي شهدت إطلاق البنك المركزي لمبادرة جديدة لدعم القطاع السياحي بتمويل من وزارة المالية، وبالتنسيق مع وزارة السياحة والآثار بمبلغ 50 مليار جنيه، وده كان في أكتوبر 2024، وحاليا بيتم إعداد مبادرة تمويل سياحية جديدة عشان تدعم القطاع السياحي بشكل أكبر.
وعشان السياحة المصرية تنمو بمعدلات أكبر، فحاليا في بعض الملفات اللي بيتم إعادة النظر لها، ومنها منح تيسيرات في تطبيق مبادرات التمويل السياحية، لأنها بتواجه تحديات في آليات التنفيذ، زي الروتين والبيروقراطية من بعض البنوك خاصة من صغار الموظفين، عشان كده لازم إصدار تعليمات واضحة بعد دراسة كل حالة على حدة عشان نلبي احتياجات قطاعات السياحة.
كمان، مطلوب إعادة تقييم المبادرات دي ونناقش كويس المردود منها وندرس أوجه القصور ونحلها فورا.
كل ده مهم بجانب الترويج الجيد للفرص الاستثمارية السياحية، وتفعيل بنك الفرص بشكل قوي، ومش بس كده لأ ده كمان مع طرح الفرص الاستثمارية على القطاع الخاص المحلي والأجنبي عشان يقدر أي مستثمر ياخد قراره بناء على معلومات واضحة ومحددة.
برضو، وضع خطط الترويج السياحي ضرورية خاصة بعد دراسة متأنية بين وزارتي السياحة والطيران والقطاع الخاص للخروج بنتائج إيجابية على المردود السياحي على مصر.
وممكن الحكومة تتبنى كمان منتج سياحي وتروج له بشكل كويس خلال سنة 2025، وممكن كمان تكون سنة 2025 عام السياحة الأثرية والثقافية خاصة احنا مقبلين على افتتاح المتحف المصري الكبير ومشروع التجلي الأعظم بمدينة سانت كاترين اللي بينتظره العالم عشان يزوره.
دي كلها كانت أسباب مهمة رفعت تصنيف مصر في مؤشر السياحة والسفر، وممكن جدا نعلى أكتر وأكتر في الفترة الجاية في حالة وجود قطاع تنشيط سياحي متكاملة، وكمان تعاون القطاع الخاص مع الحكومة عشان نحقق كل عناصر التنمية السياحية في بلدنا.
