هنصفر الديون.. خطة الحكومة لنسف ديون مصر الخارجية
الديون الخارجية لمصر واحدة من اهم الملفات علي مكتب الحكومة في الفترة الرئاسية الجديدة.. ياتري الحكومة بتتعامل مع الملف ده أزاي.. وازاي الحكومة هتسدد كل الفلوس اللي علي مصر
مصر واحدة من الدول النامية واللي عليها التزامات وديون خارجية خارجية كتيرة، ولحد اللحظة دي مصر متلزمة بسداد التزامتها من الديون بشكل كامل وكان اخرهم الديون اللي سددتها مصر لصندوق النقد الدولي واللي هيا عبارة عن ديون وفوايد ديون في 2024 واللي وصلت لـ38.7 مليار دولار منهم 7 مليار دولار سددتهم الدولة في أشهر نوفمبر وديسمبر من 2024 زي ما أعلن الدكتور مصطفي مدبولي رئيس مجلس الوزراء.
الحكومة هتسدد السنة دي نسبة اقل من الرقم اللي دفعته السنة اللي فاتت لصندوق النقد الدولي وهتوصل لـ 43.2 مليار دولار التزامات خارجية منهم 5.9 مليار دولار فوائد، و37.3 مليار دولار أصل قروض.
الالتزامات الموجودة على مصر في 2025 هيكونوا متقسميين لـ 10.4 مليار دولار علي الحكومة، والبنك المركزي هيكون ملزم بسداد 21.2 مليار دولار، والبنوك التجارية هتكون ملزمة بسداد 8.1 مليار دولار، وفي عد من القطاعات والجهات الموجودة في الدولة هتكون ملزمة بسداد 3.5 مليار دولار .
طيب الحكومة بتتحرك ازاي في ملف الديون الخارجية الموجودة عليها.
الدكتور مصطفي مدبولي رئيس مجلس الوزراء قال ان الحكومة متلزمة بسداد التزامتها الخارجية، ومش هتتاخر في سداد اي دين خارجي، ده غير التحركات اللي بتقوم بيها الحكومة لتحويل ديون بعض الجهات والدول الخارجية لاستثمارا ت في مصر، ودي جزء مهم من خطة مصر للتخلص من الديون اللي موجودة عليها.
الحكومة في الفترة اللي فاتت دخلت في مناقشات للدول اللي لها ديون في مصر لتحويل الديون بتاعتهم لاستثمارات مباشرة في السوق المصري، وبدل ما الدولة تدفع فلوس علشان تسدد ديونها لا ده الدول دي هتشتري أو تدخل في شراكات مع الحكومة المصرية في عدد من الشركات المملوكة للقطاع العام لاعادة تطويرها وزيادة انتاجها وده من خلال برنامج الطروحات واللي بتنفذه الحكومة المصرية حاليا بالشراكة مع القطاع الخاص.
وعلشان الحكومة توصل لهدفها لمبادلة الديون الموجودة علي مصر، فالحكومة شكلت لجنة وزارية عليا هتكون مهمتها التفاوض مع الدول والتحالفات البنكية اللي لها ديون عندنا لمبادلة الديون المستحقة لهم بحصص ملكية في بعض الشركات المملوكة للدولة بالأسعار العادلة، مصر في الوقت الحالي بتستهدف مبادلة 38% من ديونها الخارجية لاستثمارات مباشرة في السوق المصري.
اللجنة الوزارية المكلفة بمتابعة ملف الديون بدأت الفترة اللي فاتت في التفاوض مع الدول، وكانت البداية بالصين اللي وافقت تحول ديونها للاستثمارات مباشرة، والمفاوضات وصلت لتحويل ما يقرب من 120 مليون دولار في مشروعات تنموية خضراء، خصوصا أن الصين واحدة من الدول اللي لها ديون كبيرة جدا عندنا في مصر .
