هل يستمر الذهب في الارتفاع؟.. اعرف توقعات الأسعار الأيام الجاية
يا ترى مستقبل الذهب رايح على فين، هل هتستمر الزيادة في الأسعار في الفترة الجاية وطوال سنة 2025، ولا ممكن يحصل انخفاض مفاجىء، وإيه هي مؤشرات الأسعار العالمية للمعدن الأصفر، وهل الوقع الحالي مناسب للشراء ولا للبيع.
في الأيام الأخيرة، أسعار الدهب العالمي ارتفعت بشكل ملحوظ، عشان تسجل ارتفاع للأسبوع السابع على التوالي من بداية السنة دي 2025، ودي أول مرة تحصل من سنين كتيرة.
ولكن نقدر نقول إن أهم سبب فس ارتفاع أسعار الدهب هو زيادة مخاوف المستثمرين بقرب حدوث حرب تجارية عالمية، خاصة وإن الرئيس الأمريكي دونالد ترامب مصر على الحرب دي، وقرر يفرض رسوم جمركية على بعض الدول زي الصين وكندا، واللي قرروا هما كمان يردوا بالمثل.
ومن هنا قرر المستثمرين يتحوطوا ضد أي أزمات اقتصادية محتملة أو حتى حرب تجارية متوقعة، وأقبلوا على شراء كميات كبيرة من الدهب عشان طبعا المعدن الأصفر هو الملاذ الآمن، يعني بيسد وقت الأزمات، كمان في بنوك ومؤسسات كبيرة وكمان مستثمرين ببحفظوا فلوسهم في الدهب وقت الأزمات ومع ارتفاع معدلات التضخم، لأنه عمره ما بيخسر، وده ساهم في رفع الأسعار في الفترة الأخيرة.
عشان كده، قالت منصة "جولد بيليون"، إن سعر أونصة الدهب العالمي سجل في الساعات الأخيرة، ارتفاع بنسبة 0.3%، وده بيعتبر تسجيل لأعلى مستوى عند 2938 دولار للأونصة خاصة بعد ما افتتح تداولات اليوم عند 2928 دولار للأونصة.
نيجي بقى لتوقعات أسعار الدهب في الأيام الجاية، كل التوقعات بتقول دلوقتي إن المعن النفيس في طريقه لتسجيل ارتفاع جديد هذا الأسبوع بنسبة 2.7%، عشان يكون ده الارتفاع للأسبوع السابع على التوالي.
ولو حللنا أسباب توقعات الارتفاعات الجديدة للدهب، فهيكون أقوى سبب هو حالة عدم اليقين بشأن سياسات إدارة ترامب بخصوص التجارة والتعريفات الجمركية والسياسة الخارجية ذات، فممكن جدا السياسيات دي تزود الطلب على الدهب باعتباره ملاذ آمن، وكمان تحوط تقليدي ضد ارتفاع الأسعار وعدم اليقين الجيوسياسي.
وفي الوقت نفسه، الأسواق بتتوقع إن البنك الاحتياطي الفيدرالي مش هيخفص أسعار الفايدة لحد شهر سبتمبر الجاي، بسبب المخاوف من ارتفاع التضخم، وده سبب كفيل إنه يزود من تكلفة الفرصة البديلة للدهب بسبب الطلب الكبير عليه.
كمان، انخفض الدولار في الفترة الأخيرة بشكل كبير تحقق خساير متتالية بسبب رسوم ترامب الجمركية، وده ساعد الدهب في الارتفاع لأن في علاقة عكسية بينهم، لو الدولار ارتفع الدهب ينزل والعكس.
عشان كده، كل التوقعات بتؤكد على استمرار ارتفاع الأسعار العالمية وفي الأسواق المحلية في كل دول العالم وبينها مصر، وممكن جرام 21 عندنا يوصل ل 4 آلاف و300 جنيه قريب، يعني لو حضرتك عايز تشتري ماتترددش كتير، أما لو معاك دهب وعايز تبيع حاول تقتنص الفرصة وتبيع بأعلى سعر وتستفيد من ارتفاع الأسعار.
