اتجاهات أسعار الذهب الفترة الجاية.. وأسباب ارتفاعه والتوقعات المستقبلية
يا ترى أسعار الدهب رايحة على فين الفترة الجاية، ومع تصاعد الحرب الاقتصادية العالمية هل الأسعار ممكن تشهد ارتفاعات متتالية ولا لأ، طب اللي عايز يشتري يعمل إيه؟
في الحقيقة، أسعار الذهب ارتفعت بشكل ملحوظ مع بداية السنة دي 2025، واتجاوزت حاجز 3000 دولار للأونصة لأول مرة في التاريخ، وده طبعا كام بسبب اضطرابات اقتصادية وسياسية عالمية، زي الحرب الاقتصادية اللي شنها الرئيس الأمريكي دونالد ترامب على الصين وكندا ودول تانية تحت مسمى الرسوم الجمركية، وده بجانب حرب غزة وتصاعد التوترات في منطقة الشرق الأوسط.
كل ده كان من أسباب ارتفاع أسعار الدهب، يعني الزيادة الكبيرة في الأسعار بترجع لعدة عوامل رئيسية، أبرزها التوترات الجيوسياسية، والسياسات الاقتصادية الأمريكية، والتقلبات في أسعار العملات، وده بالإضافة لارتفاع معدلات التضخم عالميًا يعني ارتفاع أسعار السلع.
ورغم إن الدهب بيعتبر ملاذ آمن بيلجألذ له المستثمرين في أوقات الأزمات السياسية والاقتصادية، إلا أن التصعيد السياسي العالمي، خصوصًا في الشرق الأوسط وأوروبا الشرقية، زاد من حالة عدم اليقين، وده دفع المستثمرين للتحوط من خلال شراء الذهب.
كمان، تصريحات ترامب الأخيرة بشأن فرض رسوم جمركية على الصين ودول مجموعة "بريكس"، بالإضافة للقرارات المتعلقة بقطاع الطاقة، زادت من القلق في الأسواق، وده برضو دفع المستثمرين للتوجه للدهب كوسيلة لحماية أصولهم.
ضيف على كل ده، إن استمرار الأوضاع المتوترة بين أمريكا وبعض الدول الآسيوية ساهم في زيادة الطلب على الدهب عالميا، وده بجانب السياسات النقدية لمجلس الاحتياطي الفيدرالي الأمريكي، واللي بتلعب دور كبير في تحركات أسعار الدهب هي كمان، فعلى الرغم من محاولات الفيدرالي الأمريكي السيطرة على معدلات التضخم، فالتوقعات كلها بتشير إلى استمرار ارتفاع معدلات التضخم بنسبة 4.2% خلال سنة 2025، وده في حد ذاته بيزود من جاذبية الدهب كوسيلة للتحوط.
كل ده بجانب تباطؤ نمو الاقتصاد الأمريكي، وارتفاع العجز التجاري ل 1.2 تريليون دولار، وده هو كمان دفع الأسواق للبحث عن أصول أكثر استقرارًا، ومع انخفاض العائد على السندات الأمريكية، أصبح الدهب البديل الأفضل للمستثمرين، وده كمان ساهم في ارتفاع أسعاره.
وبالنسبة لأسعار الذهب في مصر، فهي شهدت زيادات كبيرة في الأبنية الأخيرة، بسبب تأثرها المباشر بالأسواق العالمية، ووصل سعر عيار 21 إلى 4,060 جنيه، كمان سجل عيار 24 نحو 4,650 جنيه، وده رغم استقرار سعر الدولار في السوق المحلي.
وطبعا، أسعار الدهب في مصر بتتأثر بعوامل كتيرة، زي قيمة الجنيه المصري، وتكاليف الاستيراد، ومستويات الطلب المحلي، ومع ارتفاع الأسعار عالميًا، فالسوق المصري هو كمان اتأثر بالموجة دي، وزاد إقبال المستثمرين على الدهب كوسيلة لحفظ الثروة.
نيجي بقى التوقعات للدهب، يا ترى رايح على فين؟
بص يا سيدي، كل السيناريوهات بتقول إن لو التوترات الجيوسياسية وارتفاع التضخم مستمر، فمتوقع أن أسعار الدهب توصل لمستويات تتجاوز 3200 دولار للأونصة خلال النصف الثاني من 2025.
ولكم ، أي استقرار في الأسواق أو تحسن في العلاقات التجارية بين الدول الكبرى، هيؤدي إلى تراجع طفيف في الأسعار، لكنه مش هيكون هبوط كبير، لأن المستثمرين أصبحوا أكثر حرصًا على الاحتفاظ بالدهب كجزء من استثماراتهم طويلة الأجل.
