تحالفات عالمية جديدة تدخل السوق المصري.. إيه اللي بيحصل في ملف البترول والغاز
إيه اللي بيحصل في قطاع الطاقة المصري وايه حكاية التحالفات العالمية الجديدة اللي هتغير خريطة الطاقة في مصر.
مصر بتنفذ خطط طموحة عشان ترجع مركز إقليمي لتصدير الطاقة وخاصة الغاز الطبيعي ومصر فيها 60 شركة عالمية في مجال البحث عن البترول واستغلاله شغالة في 83 منطقة التزام في مناطق البحر المتوسط ودلتا النيل والصحراء الغربية والشرقية وسيناء والصعيد، في إطار اتفاقيات بترولية لجذب الاستثمارات الأجنبية وتعزيز الشراكة مع الشركات العالمية.
الجديد في ملف التنقيب عن كنوز مصر من البترول والغاز انه فيه 5 شركات بترول عالمية تعتزم استثمار 130 مليون دولار في مصر لحفر 10 آبار في البحر المتوسط بشرق بورسعيد والصحراء الغربية بمنطقة الأبيض.
وحسب وثيقة رسمية فيه دلوقتي تحالف من 3 شركات يضم "أيوك" الهولندية و"بي بي إكسبلوريشن" الانجليزية، وقطر للطاقة الدولية بيسعى لضخ استثمارات بقيمة 100 مليون دولار لاستكشاف الغاز والزيت الخام في منطقة شرق بورسعيد بالبحر المتوسط على مساحة 2621 كيلو مترا مربعا.
وحسب الاتفاق يلتزم التحالف الجديد بحفر 3 آبار استكشافية على 3 مراحل في منطقة الامتياز خلال 8 سنين بواقع 40 مليون دولار خلال 3 سنين و30 مليون دولار في المرحلة التانية وبنفس المدة و30 مليون دولار خلال سنتين بالمرحلة التالتة وكشفت وثيقة ثانية ان "أيوك" الهولندية و"أبكس" هيضخوا استثمارات بـ 30 مليون دولار على مرحلتين في منطقة امتياز شرق الأبيض بالصحراء الغربية على مساحة نحو 746 كيلو متر مربع وبتوصل الاستثمارات في المرحلة الأولى 17 مليون دولار، لعمليات البحث وحفر 4 آبار خلال المرحلة الأولى ومدتها تصل 3 سنوات، فيما تبلغ الاستثمارات في المرحلة التانية نحو 13مليون دولار مع الالتزام بحفر 3 آبار خلال فترة الامتداد ومدتها سنتين.
حسب المعلومات الشركتين قدموا طلب إلى الهيئة المصرية العامة للبترول لتعديل اتفاقية الالتزام بهدف ضخ استثمارات إضافية وتسريع إنتاج الاحتياطيات المتواجدة بالمنطقة لتلبية الاحتياجات المتنامية للغاز الطبيعي سواء للسوق المحلية أو التصدير.
طبعاً الاكتشافات الجديدة المنتظرة هتضيف مزيد من الإنتاج المحلي للبترول والغاز الطبيعي وهتوفر على الدولة مليارات الدولارات اللي بتدفعها في الاستيراد كل سنة وفي نفس هتدخل نقد اجنبي زيادة من خلال الإنتاج أو ضخ استثمارات للتنقيب في مناطق الامتياز.
