لا دولار ولا استيراد.. اقتصاد مصر في حتة تانية
الاقتصاد المصري رايح في حتة تانية.. ليه بنقول كده وايه اللي بيحصل في القطاعات كلها وازاي الدولة بتردم الدولار على مراحل وايه المفاجأة اللي كشفها مدبولي للمصريين في الساعات الأخيرة.
رغم الظروف الصعبة اللي مرت بيها مصر بداية من 2022 ومرورها باخطر أزمة عملة في تاريخها الحديث واللي تزامنت مع أزمات تانية زي ارتفاع أسعار السلع عالميا وزيادة فاتورة الاستيراد واستنزاف الدولار من الأسواق وتوحش السوق السوداء لكن رغم كده مصر قدرت تحول المحنة إلى منحة واعتمدت على بنية أساسية قوية بنتها في العشر سنين الأخيرة واللي قدرت تنقذ الاقتصاد المصري في الوقت المناسب لأنها هي اللي جذبت الاستثمارات الجديدة وهي اللي حولت مصر لمركز لوجستي عالمي وقدرت تأسس لاقتصاد حديث ومتنوع ومتعدد حسب خطط طموحة.
بعد تحرير سعر الصرف في مارس اللي فات قدرت مصر انها تستقبل مليارات الدولارات كاستثمارات في راس الحكمة والساحل الشمالي كله واقتصادية قناة السويس وتوطن الصناعات وترفع قيمة الصادرات وتعمق الشراكات الاقتصادية مع دول كتير وتجذب علامات تجارية دولية لقت في السوق المصري فرصة للاستثمار الناجح.
طيب ليه احنا بنتكلم النهاردة عن الاقتصاد المصري ؟
عشان ببساطة تعرف البلد رايحة على فين وتصدق الأرقام ومتصدقش إشاعات وأكاذيب لأن الاقتصاد عالم شفاف بتحكمه النتائج والأرقام والبيانات ومفيش حاجة بتستخبى دلوقتى والوكالات الدولية عندها كل التفاصيل عن كل الاقتصاديات لأن الأرقام والبيانات دي هي اللي بتحرك سوق الاستثمارات الأجنبية واللي بيقدر بالتريليونات يعني ماينفعش اي حكومة تطلع بيانات مش صحيحة.. الأرقام والتقارير الدولية المعتمدة بتقول إن مصر جاية وماشية على الطريق الصحيح وفيه زيادة في الاستثمارات والتدفقات الدولارية زي ماقال صندوق النقد الدولي والبنك الدولي وبنوك عالمية تانية زي جولدمان ساكس وغيره.
الارقام بتقول إن مصر شغالة على خطط نفسها طويل للقضاء على أسطورة الدولار ودا من خلال خطط التصنيع والتصدير والتوسع في التجارة البينية مع الدول واقتحام الأسواق الجديدة ومضاعفة الإيرادات الأجنبية من السياحة وقناة السويس والاستثمارات وتحويلات المصريين بالخارج ومصر خططت توفر 300 مليار دولار في السنة بحلول الكام سنة اللي جايين ودا رقم مش كبير على فكرة مقارنة بإمكانيات الاقتصاد المصري الواعد والكبيرة.
والأرقام بتقول كمان إن مصر لما تخلص باقي المشروعات الضخمة سواء في الصناعة أو السياحة أو الزراعة اقتصادها هيروح في حتة تانية ومصر خلال سنتين بص هتحقق طفرة في إنتاج البترول والغاز زي ما قال رئيس الوزراء في الساعات الأخيرة وهتوفر مليارات الدولارات في الاستيراد وفي نفس الوقت هترجع تصدر من تاني يعني هتكسب مليارات زيادة ولو متعرفش فنحب نقولك إن مصر حفرت 105 آبار جديدة فى قطاع البترول خلال الـ 6 أشهر اللي فاتت وإضافة 64 ألف برميل يومي للإنتاج ودي مجرد البداية وظهرت البشاير في الحقول الجديدة القريبة من حقل ظهر القديم وكينج مريوط وغيرها من مناطق الاستكشاف والتنقيب.
