ليه مصر مهتمة بسياحة اليخوت؟.. وإيه علاقة الموضوع بأزمة الدولار؟
مصر في الفترة الأخيرة اعلنت عن طرح نوع جديد من السياحة وهو سياحة اليخوت... ياتري مصر عايزة اية من سياحة اليخوت.. واية الفايدة اللي هترجع علي مصر من تنشيط النوع ده من السياحة.
الفترة الحالية الدولة بتحاول بكل الطرق أنها تنشط كل أنواع السياحة، وكمان بتعمل أنواع جديدة من السياحة، وبقي عندها هنا في مصر سياحة شاطئية وثقافية وترفيهية وسياحة المهرجانات والمؤتمرات والسياحة العلاجية ودولوقتي مصر بتضيف سياحة اليخوت، وده نوع من أنواع السياحة واللي كان مش معروف ولا منتشر في السنين اللي فاتت.
طيب اية حكاية سياحة اليخوت دي وازاي مصر هتستفاد بالنوع ده من السياحة؟.
سياحة اليخوت دي هيا سياحة اثرياء العالم، ودول فئة من الناس عندهم يخوت فاخرة، وبيكونوا متعودين بين كل فترة والثانية ياخذوا اليخت بتاعه ويطلع علي دول ما يقضي كام يوم ويرجع تاني، والنوع ده من السياحة بيكون عالي الانفاق خصوصا أن بيضم فئة محددة من مشاهير وأصحاب رؤوس الأموال في العالم .
في الفترة الأخيرة مصر استقبلت أكثر من طلب لدخول يخت سياحي فاخر والطلبات كانت بتزيد يوم عن يوم، وعلشان كده الدولة قررت تعمل منصة خاصة بسياحة اليخوت، والمنصة دي الكترونية ويقدر اي حد في العالم يدخل عليها وينهي اجراءات دخول لمصر خلال 30 دقيقة بس، وده بس الاجراءات الروتينية اللي كانت بتحصل قبل كده واللي كانت بتقعد ايام طويلة علي ما السائح ياخذ تصريح بدخول يخت سياحي لأي مدينة.
المنصة الجديدة اللي اعلنت عنها الحكومة لسياحة اليخوت تضمنت كمان زيادة مدة الإقامة في مصر كنوع من الحوافز اللي بتقدمها الحكومة لتنشيط سياحة اليخوت، ودولوقتي الحكومة مدت الفترة المقررة للسائحين اللي جايين مصر علي سياحة اليخوت لـ3 اشهر بدلا من شهر، ده غير أنها طورت الموانئ والمراسي السياحية لاستيعاب أكبر عدد من اليخوت الفاخرة، وكمان عملت افلام ترويجية عالمية للترويج لسياحة اليخوت في مصر، والحملات دي استهدفت ابرز المعالم السياحية والطبيعية اللي يقدر السائحين القادمين لمصر دخولها والاستمتاع باجوائها.
مصر في الوقت الحالي بتحاول بكل الطرق أنها تعظم حركة الإقبال السياحي الوافدة من الخارج علشان توصل لتحقيق 18 مليون سائح بنهاية السنة دي وتحقيق امثر من 18 مليار دولار كايرادات للقطاع.
