حكاية الـ88 مليار دولار اللي هتدخل مصر من قناة السويس.. مفاجأة عن السعر العادل للدولار أمام الجنيه.. جنون ترامب يشعل أسواق العالم.. وتطور جديد في سوق الغاز المصري
رصدت بانكير، عدد من الأحداث المحلية والعالمية، عبر منصاتها المختلفة خلال الساعات الأخيرة، ولذلك سوف نستعرض معكم أبرز الأخبار ضمن الجولة العالمية الجديدة في أسواق المال والشركات والطاقة حول العالم، تأتيكم من بانكير.
والتقرير الأهم النهاردة كان حوالين الايرادات المتوقعة من قناة السويس وازاي الدولة هتوصل لـ88 مليار دولار عائدات القناة وهل ممكن دا يحصل؟
وشرح التقرير إن قناة السويس أهم مجري ملاحي في العالم، واللي بسبب التوترات الجيوسياسية في الشرق الأوسط ايراداتها تراجعت باكثر من 70% عن الارقام اللي كانت القناة بتحققها في الأوقات اللي فاتت.
وقال التقرير إن الحكومة المصرية كشفت في وثيقة عن خطتها لتطوير حركة الملاحة بمجري القناة زيادة الإيرادات، ومصر بتستهدف أنها توصل بإيرادات القناة لـ88.1 مليار دولار في الفترة من 2024 ولحد 2030، وده هيحصل من خلال استهداف زيادة إجمالي السفن اللي هتمر في القناة لـ190.7 ألف سفينة بحمولة 13.4 مليار طن خلال نفس الفترة.
وكشفت الوثيقة إن الدولة بتستهدف كمان زيادة استثمارات القطاعات الصناعية في المنطقة الاقتصادية لـ 5.4 تريليون جنيه في 2030، وده هيحصل من خلال تحويل قناة السويس لمركز إقليمي للطاقة الخضراء وإنشاء مناطق اقتصادية وخدمات بحرية ولوجستيات واتصالات وتكنولوجيا المعلومات وتقنيات مالية وتجارة للترانزيت، ده غير الوصول لتوفير مليون فرصة عمل مباشرة في 2030.
وحدة أبحاث بانكير قدمت تقرير خاص عن السعر العادل للدولار وكشفت مفاجأة من العيار التقيل.
وكشف تقرير بانكير إن مؤشر بيج ماك فجر مفاجأة صادمة لما قال إن سعر الدولار العادل في مصر هو 23.32 جنيه وليس 50.40 جنيه حسب سعره الحالي في البنوك النهاردة.
وشرح التقرير إن مؤشر بيج ماك دا أطلقته مجلة ايكونوميست الاقتصادية الشهيرة والعريقة في العالم في سنة 1986 لقياس أداء العملات ومهمته مقارنة المؤشر أسعار هامبورج بيج ماك لتحديد قيمة العملات في العالم والمجلة العالمية أطلقت المؤشر دا لأنه شافت أن فيه عملات كتير في العالم مظلومة ومقدرة بأقل بكتير من قيمتها الحقيقية.
ولفت التقرير إن مؤشر ايكونوميست قال إن كلفة البيج ماك في مصر 135 جنيه في نفس الوقت سعره في الولايات المتحدة الأمريكية 5.23 دولار وحسب المؤشر السعر العادل للجنيه مقابل الدولار هو 23.32 جنيه بدل سعره الحالي اللي بيزيد عن 50 جنيه.
وحدة أبحاث أفردت مساحة كبيرة عن حالة الرعب اللي بتجتاح أسواق العالم بسبب سياسات الرئيس الأمريكي ترامب.
وشرح التقرير إن الليلة اللي فاتت الأسواق المالية كانت على صفيح ساخن.. بورصات أوروبا وآسيا اكتست كلها باللون الأحمر.. الأسهم الأمريكية في النازل والدولار طاير لفوق.. كل ده بسبب قرار واحد من الرئيس الأمريكي دونالد ترامب بفرض رسوم جمركية جديدة على كندا والمكسيك والصين.
وشرح التقرير إن ترامب قرر فرض 25% رسوم على الواردات من كندا والمكسيك، و10% على منتجات الطاقة الكندية وكمان 10% على السلع الصينية... قرار نزل على الأسواق زي الصاعقة والنتيجة كانت موجة بيع حادة خلت المستثمرين يجروا على الملاذات الآمنة زي الدولار والذهب.
وشرح التقرير تأثيرات قرارت ترامب على الأسعار وسلاسل الإمداد وقال إنه باختصار.. الأسعار هتعلى.. لأن الرسوم الجمركية دي مش مجرد قرارات سياسية.. دي بتأثر على تكلفة الإنتاج والشحن والتوريد.. يعني السلع اللي كان بيتم استيرادها بسهولة وبأسعار مقبولة دلوقتي هيكون عليها رسوم إضافية والتكلفة دي في الآخر هتوصل للمستهلك.
التقرير الأخير اللي قدمته منصات بانكير كان خاص بتطور هام في ملف الغاز المصري..
وقال التقرير إن وكالة "فيتش سوليوشنز" رفعت توقعاتها لإنتاج الغاز الطبيعي في مصر خلال الربع الأول من 2025.. وده بعد استئناف عمليات الحفر في حقل "ظُهر" العملاق اللي بتديره شركة "إيني" الإيطالية.. وكمان التقدم في مشروع "ريفين" اللي شغال عليه شركة BP البريطانية.
وشرح بانكير إن التوقعات بتقول إن الإنتاج هيزيد بنسبة 2.5% في 2025 ومعاها كمان زيادة إضافية 1% في 2026. وده بسبب إعادة تشغيل أعمال الحفر في حقل ظُهر اللي هيضيف حوالي 220 مليون قدم مكعب يوميًا
وكشف التقرير إن زيادة إنتاج الغاز هتساعد مصر على تقليل الضغط على السوق المحلي.. خصوصًا بعد ما استهلاك الغاز المصري نزل 27% في آخر 3 سنين، لكن في 2024 الاستهلاك ثبت تقريبًا وما بقاش فيه انخفاض كبير.
وقال كمان إن زيادة الإنتاج ممكن تفتح الباب قدام عودة صادرات الغاز الطبيعي المسال اللي توقفت تمامًا من مارس 2024.. تخيل إن مصر كانت بتصدر 854 مليون متر مكعب بس السنة اللي فاتت.. وده رقم ضعيف جدًا مقارنة بالسنين اللي قبلها.
