رعب يجتاج أسواق العالم.. إيه اللي بيحصل بعد تهديدات ترامب
يا ترى إيه اللي بيحصل في الأسواق العالمية؟ وليه البورصات كلها بتولع والناس عمالة تبيع بشكل جنوني؟ وإزاي قرار واحد من ترامب قلب الدنيا وخلى الأسعار والدولار يتحركوا بالشكل ده؟! وهل فعلاً الأزمة دي ممكن تسبب ركود عالمي جديد؟
الليلة اللي فاتت الأسواق المالية كانت على صفيح ساخن.. بورصات أوروبا وآسيا اكتست كلها باللون الأحمر.. الأسهم الأمريكية في النازل والدولار طاير لفوق.. كل ده بسبب قرار واحد من الرئيس الأمريكي دونالد ترامب بفرض رسوم جمركية جديدة على كندا والمكسيك والصين.
ترامب قرر يفرض 25% رسوم على الواردات من كندا والمكسيك، و10% على منتجات الطاقة الكندية وكمان 10% على السلع الصينية... قرار نزل على الأسواق زي الصاعقة والنتيجة كانت موجة بيع حادة خلت المستثمرين يجروا على الملاذات الآمنة زي الدولار والذهب.
بس الغريب إن الدولار طلع.. والدهب ما خدش القفزة اللي الناس كانت متوقعاها.. وده معناه إن الأسواق شايفة إن الأزمة دي هتخلي الفيدرالي متشدد أكتر في أسعار الفايدة.. وده اللي يخلي الدولار أقوى وأقوى.
طب تعالوا نشوف رد فعل الأسواق.. الأسهم الأوروبية نزلت بقوة.. مؤشر ستوكس 600 الأوروبي خسر 1.3% في بداية التداولات.. وأسهم السيارات والتكنولوجيا أكتر المتضررين.
مؤشر داكس الألماني وقع أكتر من 1.7%.. وأي حد شغال في الصناعة في أوروبا دلوقتي عنده كابوس حقيقي.
الأسهم الآسيوية مش أحسن حال.. تويوتا وهوندا وكيا وهيونداي كلهم خسروا بسبب اعتمادهم على التصنيع في كندا والمكسيك.
نيكي الياباني نزل 2.4%.. وكمان توبكس تراجع 2.25%.. أسوأ يوم للأسهم الأسترالية من 5 شهور.
طب إيه التأثير على الأسعار وسلاسل الإمداد؟
باختصار.. الأسعار هتعلى.. الرسوم الجمركية دي مش مجرد قرارات سياسية.. دي بتأثر على تكلفة الإنتاج والشحن والتوريد.. يعني السلع اللي كان بيتم استيرادها بسهولة وبأسعار مقبولة دلوقتي هيكون عليها رسوم إضافية والتكلفة دي في الآخر هتوصل للمستهلك.
تخيل إنك بتشتري عربية.. لاب توب.. أو حتى موبايل جديد.. كل حاجة جاية من الصين أو المكسيك أو كندا هيزيد سعرها بشكل مباشر.
وكمان شركات كتير هتبدأ تعيد حساباتها.. هل تفضل تنتج في المصانع الخارجية وتدفع الجمارك العالية؟ ولا ترجع التصنيع لأمريكا وتدفع تكاليف عمالة أعلى؟! ده لوحده هيعمل ارتباك كبير في السوق.
طب إيه موقف الأسواق الأمريكية؟
مؤشر داو جونز نزل 0.75%.. أسهم التكنولوجيا في النازل.. لأن أي حاجة ليها علاقة بالإنتاج في الصين هتتأثر.
لكن العجيب إن الدولار هو المستفيد الوحيد.. المستثمرين بيهربوا ليه لأنه الملاذ الآمن دلوقتي.. وده خلى الدولار الكندي ينهار لأقل مستوى من 22 سنة.
الأزمة دي مش هتقف عند الأسهم بس.. سوق العملات الرقمية كمان خسر بشكل رهيب.. البيتكوين وقع 6.5% ونزل لأقل مستوى من 3 أسابيع وباقي العملات الرقمية بتتراجع بشكل ملحوظ .. كل ده بسبب الخوف من تأثير الرسوم الجمركية على حركة الأموال والتجارة العالمية.
السؤال دلوقتي.. هل دي مجرد حركة من ترامب عشان يضغط على الدول ؟ ولا فعلاً الاتجاه العام رايح لحرب تجارية جديدة هتعصف بالأسواق؟!
اللي متأكدين منه إن الأيام الجاية هتكون مليانة تقلبات وفرص.. لكن برضه مليانة مخاطر.
