باب دولاري جديد.. المكاسب الاقتصادية من إقامة مجمع صناعي للفوسفات والأسمدة
يا ترى إيه قصة المجمع الصناعي للفوسفات والأسمدة الزراعية اللي الحكومة بتخطط لتنفيذه دلوقتي، وإيه هي المكاسب الاقتصادية منه، وامته هتظهر بوادر المشروع ده على أرض الواقع.
في الحقيقية، الحكومة فعلا ممثلة في وزارة قطاع الأعمال العام، بتتعاون دلوقتي مع شركة AMIH الدولية القابضة وشركة ويلسون الهندية التابعة لها، عشان تنفذ مجمع صناعي لرفع تركيز خام الفوسفات بمناجم شركة النصر للتعدين التابعة للشركة القابضة للصناعات المعدنية.
والمشروع ده الهدف منه هو تطوير صناعة التعدين في شركات الحكومة، وكمان زيادة القيمة المضافة للموارد الطبيعية، وتحقيق أكبر استفادة منها.
عشان كده، دلوقتي بيتم تسريع معدلات الموقف التنفيذي للمشروع والإجراءات النهائية لتأسيس شركة مشروع بالشراكة بين شركة النصر للتعدين ومجموعة الصافي وشركة ويلسون الهندية، وبيتم إنهاء كل الجوانب المتعلقة بتنفيذ المشروع، من حيث مثلا الخامات اللي هيتم رفع تركيزها لدى شركة النصر للتعدين، وعمليات الدعم الفني والتكنولوجي اللي هتقدمه شركة ويلسون لرفع تركيز خام الفوسفات، وده كله عشان نزود القيمة المضافة ووفقاً لأعلى مستويات الجودة..
ومن هنا، هنقدر نوفر للسوق المحلي، الأسمدة الفوسفاتية والمنتجات المرتبطة، زي حمض الكبريتيك وحمض الفوسفوريك، وهنثدر نستخدم أفضل الأساليب التكنولوجية لزيادة القيمة المضافة، ومش بس كده ده المشروع ده هيساهم في خفض معدلات استهلاك الكهرباء.
كمان، المشروع ده بيستهدف التصدير إلى الأسواق الخارجية في ظل الطلب المتزايد على المنتجات دي في الأسواق العالمية، يعني هنوفر للسوق المحلي ونصدر للخارج، فهيكون مصدر دولاري جديد.
كمان، المشروع ده مهم جدا، لأنه بيندرج في إطار توجه الدولة واستراتيجية الوزارة لتطوير الصناعة الوطنية ونقل وتوطين التكنولوجيا الحديثة، وكمان زيادة قيمة المضافة للخامات المحلية، عشان يساهم في تلبية احتياجات السوق المحلي والتصدير للخارج.
وكمان، هيقدر يفتح آفاق جديدة للتصدير لزيادة مصادر النقد الأجنبي ، وكل ده بيساهم بشكل كبير في تعزيز الاقتصاد الوطني، ده غير إنه بيوفر فرص عمل جديدة للشباب، يعني مشروع اقتصادي متكامل بيتماشي مع رؤية مصر 2030 للتنمية المستدامة.
وفي الفترة الجاية، هنلاقي المشروع منفذ على أرض الواقع وفي فترة مش أكتر من سنتين، عشان يكون واحد من ضمن آلاف المشروعات اللي بتساهم في دعم الاقتصاد المصري بشكل كبير وسريع.
