لغز قفزة التحويلات الخارجية.. حدث عظيم في خليج السويس.. تطور مفاجئ في ملف قرض صندوق النقد.. و18 مليار دولار منتظرة من السياحة
منصات بانكير قدمت عدد مهم جدا من التقارير والتحليلات في الشأن الاقتصادي والمالي والمؤشرات في الأسواق، خلال الساعات الأخيرة، والتي تشغل بال الكثير من المواطنين طوال الوقت.. وسوف نستعرض معكم أبرزها.
الحقيقة كان فيه أكتر من خبر سار وكلها بتصب في صالح الاقتصاد المصري واولها إعلان وزارة البترول عن كشف بترولي جديد في خليج السويس باحتياطي أولي 8 مليون برميل.
وشرح التقرير إن مصر ليها فترة شغالة بقوة في ملف التنقيب عن البترول والغاز على مستوى الجمهورية وطرحت عشرات من مناطق الامتياز أمام الشركات العالمية للتنقيب عن البترول والغاز ودا بعد سداد معظم مستحقات شركات التنقيب العاملة في مصر ودا فتح شهية الشركات الأجنبية على التنقيب في مصر وخاصة بعد بشاير التنقيب في اكتر من موقع حفر عن الغاز والبترول..
ولفت التقرير إن وزارة البترول أعلنت اكتشاف احتياطيات نفطية تقدر ب 8 مليون برميل على الأقل في بئر "إيست كريستال-1" بخليج السويس، والتى بتتولي اعمال التنقيب فيه شركة دراجون أويل الإماراتية ودا غير إن حجم البترول الخام المكتشف كان في طبقة واحدة من التربة ولسه في طبقات تانية هيتم البحث فيها ومتوقع تزيد من الاحتياطي المعلن بشكل كبير.
وأشار التقرير إن البئر "إيست كريستال 1" هو تانى بئر استكشافى ناجح يتم حفره بناء على تطبيق أحدث تقنيات المسح السيزمى وهى تقنية المسح السيزمى القاعى واستخدام التكنولوجيا الجديدة في أعمال الاستكشاف والتنقيب في مصر هتوصل لاكتشفات ضخمة جديدة.
وشرح بانكير إن أي كشف بترولي أو في الغاز بيكون ليه تأثير مباشر على السوق المصري وعلى توفير الدولار في مصر لان فاتورة استيراد المواد البترولية مكلف جدا وبيستنزف موارد دولارية ضخمة وخاصة في أوقات الصيف وكفاية نعرف إن الحكومة استوردت غاز ووقود بحوالي 15 مليار دولار من الوقود في 2024.
منصات بانكير سلطت الضوء عن بيان البنك المركزي المصري بخصوص القفزة في ملف تحويلات المصريين بالخارج.
وشرح التقرير إن تحويلات المصريين في الخارج زادت بنسبة 47.1% في سنة 2024 ووصلت لـ26.3 مليار دولار خلال 11 شهر بس.. وده رقم كبير مقارنة بالسنة اللي فاتت.
ولفت بانكير أهمية تحويلات المصريين في الخارج وقال إنها بتعتبر أكبر مصدر للعملة الصعبة في مصر وبتتفوق على السياحة وقناة السويس والاستثمارات الأجنبية المباشرة.. وإنه لما التحويلات تزيد البنك المركزي بيلاقي دولارات أكتر وده بيساعد في تقليل الضغط على الاحتياطي النقدي.. والتحويلات دي كمان بتساعد في تغطية فاتورة الاستيراد خصوصًا إن مصر بتستورد جزء كبير من احتياجاتها بالدولار.
وأشار التقرير لأسباب الزيادة الكبيرة في تحويلات المصريين بالخارج ومنها تحسن أوضاع المصريين العاملين في الخارج بعد التعافي الاقتصادي في الخليج وأوروبا.. وكمان إجراءات البنك المركزي اللي شجعت المصريين يحوّلوا فلوسهم عبر القنوات الرسمية بدل السوق السودا..و استقرار سوق الصرف نسبيًا وده خلّى الناس تثق أكتر في التحويلات الرسمية.
وخلص التقرير إن تحويلات المصريين بالخارج زادت ودي حاجة إيجابية جدا لكن لوحدها مش كفاية عشان تحل أزمة الدولار بالكامل.. الحل النهائي لازم يكون من خلال زيادة الصادرات وجذب استثمارات أجنبية، وتقليل الاعتماد على الاستيراد بالدولار.
التقرير التالي اللي عرضته منصة بانكير كان بخصوص أخر تطورات ملف قرض مصر من صندوق النقد الدولي.
وشرح التقرير إن الدكتور محمد معيط وزير المالية السابق واللي هو في نفس الوقت المدير التنفيذي بصندوق النقد الدولي صرح وقال النهادرة إن المراجعة الرابعة لبرنامج التمويل بين الصندوق ومصر على مستوى الخبراء انتهت بنجاح.
ولفت التقرير إنه باقي بس تحديد معاد اجتماع المجلس التنفيذي واللي هيكون قريب جدا لانتهاء المراجعة رسميا وصرف الشريحة الرابعة اللي بتوصل مليار و200 مليون دولار حسب تأكيد معيط.
التقرير سط الضوء كمان على أهمية صرف الشريحة الرابعة من القرض المصري وقال إنها هتعزز الثقة الدولية في الأسواق المصرية وهتجذب مزيد من الاستثمارات الأجنبية لأن صرف الشريحة معناها شهادة ثقة من صندوق النقد الدولي في السوق المصري ودا بيكون ليه تأثير مباشر على تدفق الاستثمارات المباشرة وغير المباشرة لأن في النهاية المستثمر بيدور على أسواق مستقرة وآمنة.
وأشار التقرير إن موقف صندوق النقد الايجابيس من اي دولة بيكون عامل أساسي في تصنيف اقتصادها للأفضل ودا معناه دفعة قوية في الاستثمار المباشر وتدفق الأموال الساخنة واللي مصر استقبلت منها مليارات الدولارات وحسب البنك المركزي المصري وصل صافي تدفقات الاستثمار الأجنبي المباشر في مصر 46.1 مليار دولار بنهاية العام المالي اللي فات 2023-2024.
وحدة أبحاث بانكير سلطت الضوء عن مستقبل السياحة في مصر وإزاي إن ايرادتها ممكن تتدخل للبلد 18 مليار دولار سنويا
وقال التقرير إن السياحة واحد من الموارد المهمة جدا للاقتصاد المصري.. ومصر عندها خطة أنها توصل لـ18 مليون سائح..
وسلط التقرير الضوء على جهود الدولة في الفترة اللي فاتت للترويج بشكل عالمي للسياحة، وعلشان تستهدف اسواق سياحية بتعتبر مش معروفة للسوق السياحي المصري.. والهدف جذب 18 مليون سائح فى 2025 والرقم ده لو اتحقق ممكن يدخل للبلد حوالى 18 مليار دولار.
وشرح التقرير إن مصر في الوقت الحالي تستعد علشان تعمل معجزة جديدة في عالم الترويج السياحي وهتكون من افتتاح المتحف المصري الكبير واللي بيعد أنه هيكون من اكبر المتاحف الأثرية.
وأشار التقرير إن المتحف المصري الكبير مش هيكون هو المفاجاة الوحيدة في 2025 لأن فيه مفاجآت تانية زي افتتاح متحف عواصم مصر بالعاصمة الإدارية الجديدة واللي هيحي تاريخ عواصم مصر علي مر التاريخ وافتتاح اعمال تطوير منطقة الأهرامات الاثرية.
