انطلاقة عالمية.. السيسي يكشف ملامح اقتصاد مصر الجديد
الرئيس السيسي قال إيه عن الاقتصاد المصري وايه حكاية الاقتصاد الجديد اللي مصر اقتحمته وناوية تتوسع فيه وليه الرئيس اتكلم النهاردة عن عالم الاتصالات وتكنولوجيا المعلومات.
الرئيس السيسي استقبل النهاردة كريستوفر كالدويل، الرئيس التنفيذي لشركة كونسنتركس الأمريكية الرائدة في مجال تقديم خدمات التعهيد والأعمال ومراكز الاتصال ودي شركة عالمية في تخصصها والرئيس عادة مش بيستقبل رؤساء شركات عالمية غير لما يكون فيه مشروعات ضخمة معاها هتنفذها في السوق المصري وهتعمل فارق كبير في الاقتصاد المصري واحنا عارفين إن صناعة تكنولوجيا المعلومات بقت صناعة عالمية وهي اللي بتعتمد عليها الاقتصاديات العالمية دلوقتي.
الرئيس عبدالفتاح السيسي اتكلم مع الضيف الأمريكي عن اهتمام مصر بتعزيز البنية التحتية في مجالات الاتصالات وتكنولوجيا المعلومات وقال إن الدولة أطلقت عددا كبير من البرامج التدريبية والتأهيلية لتعزيز وتطوير كفاءات الكوادر الرقمية،خصوصا من الشباب لإعدادهم للانخراط والعمل في الشركات العاملة في القطاعات المرتبطة بالاتصالات وتكنولوجيا المعلومات بجانب حرص الدولة على توفير حزمة من الحوافز الاستثمارية لجذب الشركات العالمية والمحلية للعمل في مصر لزيادة القدرة التنافسية لصناعة التعهيد ضمن استراتيجية مصر الرقمية.
وشهد لقاء الرئيس مع رئيس الشركة الأمريكية استعراض خطط الشركة للتوسع في مصر سواء من خلال زيادة عدد العاملين في فروع الشركة المنتشرة في مختلف محافظات الجمهورية وخلق فرص عمل عديدة في القطاع الحيوي من خلال إنشاء فروع جديدة للشركة في جميع المحافظات لخدمة الأهداف الطموحة للدولة في تنمية وتطوير قطاع الاتصالات، والعمل على جعل مصر مركزًا عالميًا للخدمات الرقمية.
الرئيس ناقش كمان خطط توسيع حجم صادرات خدمات التعهيد اللي بتعتمد على قيام شركات اجنبية بفتح مراكز متخصصة ليها في مصر وتوظيف متخصصين مصريين لتقديم خدمات رقمية لعملاء الشركات دي خارج مصر وعشان كده رئيس شركة كونسنتركس أشاد بالتقدم الملحوظ في قطاع الاتصالات وتكنولوجيا المعلومات في مصر وعبر عن تقديره للجهود اللي بتبذلها الدولة المصرية في مجال التحول الرقمي، وتوفير البيئة المناسبة لجذب الشركات الدولية.
وأكد على حرص الشركة الأمريكية على الاستفادة من الإمكانيات اللي بتوفرها مصر لصناعة التعهيد سواء من حيث تطور البنية التكنولوجية أو توافر الكفاءات والمهارات الرقمية، وكشف ان عدد العاملين في الشركة بمصر زاد من 150 متخصص في سنة 2009 ليصل حاليا إلى 20 ألف متخصص وبكده يبقي مصر فيها اكبر مركز تعهيد في أفريقيا والشرق الأوسط و ان الشركة ناوية تزود عدد المتخصصين العاملين المصريين عندها ليصل إلى 35 ألف بحلول 2028.
طيب ايه هي صناعة التعهيد؟
ببساطة كده هي دخول طرف تالت في عمليات تصنيع المهام أو المنتجات يعني مثلا مصر تصنع اجزاء من منتجات عالمية لصالح شركات عالمية وتعيد تصديرها ودا للاستفادة من موقعها المتميز أو قربها من الأسواق ودا لأن تصنيعها في مصر هيوفر على الشركات الأجنبية أموال وفي نفس الوقت مصر يكون عندها صناعة جديدة وبالارقام حجم سوق صناعة التعهيد العالمي وصل لأكتر من 320 مليار دولار سنويًا وامريكا بتسيطر علىه بحوالي 160 مليار دولار وحجم العمالة في هذا المجال بمصر اكتر من 100 ألف موظف لمتخصصين يعملون في مجال تصدير الخدمات 70 % منهم فى الشركات الكبيرة، والنسبة المتبقية في الشركات الصغيرة والمتوسطة.
