حاجة غريبة بتحصل فى البنوك آخر 10 شهور.. يا ترى إيه السبب؟
هو ليه البنوك المصرية قللت استثماراتها في أذون الخزانة بـ226 مليار جنيه في 10 شهور بس؟ إيه اللي بيحصل في السوق؟ وهل ده معناه إن في أزمة ولا العكس تمامًا؟
في آخر 10 شهور البنوك المصرية خفّضت استثماراتها في أذون الخزانة بنسبة 18% يعني حوالي 226 مليار جنيه وده خلّا ناس كتير تسأل: ليه؟ وإيه تأثيره على الاقتصاد؟
خلّينا الأول نفهم يعني إيه "أذون خزانة".. ببساطة دي أدوات دين حكومية، البنوك بتشتريها كطريقة مضمونة تستثمر فيها فلوسها.. يعني البنك بيدّي الحكومة فلوس لفترة محددة مقابل فايدة بتتحدد حسب ظروف السوق.
طب ليه البنوك قللت استثماراتها في الأداة الآمنة دي؟
فيه أسباب كتير لخطوة البنوك المفاجئة أهمها تحرير سعر الصرف وتأثيره على السوق .. لأن لما حصل تحرير لسعر الصرف في مارس اللي فات، الأجانب زاد إقبالهم على أذون الخزانة. وده قلّل الفرصة قدام البنوك المحلية لأن الأجانب قدموا طلبات أكتر وبأسعار أفضل.. ببساطة الأجانب خطفوا الكعكة الأكبر.
من الأسياي كمان تراجع أسعار الفائدة على بعض العطاءات.. وزارة المالية قدرت تقلل تكلفة الاستدانة في بعض المزادات بسبب الطلب الكبير.. فده خلّى العائد على أذون الخزانة مش مغري للبنوك زي زمان خصوصًا مع ارتفاع تكلفة الفوايد اللي البنوك بتدفعها لعملائها على الودايع والشهادات.
وخد عندك كمان الوديعة الأسبوعية من البنك المركزي.. البنك المركزي المصري قدّم للبنوك خيار تاني مغري جدًا هو "الوديعة الأسبوعية" اللي بفائدة ثابتة وصلت لـ27.75%.. البنوك لقت ده حل مثالي خاصة إنها بتضمن عائد عالي في وقت قصير وبدون مجازفة.
طب هل ده معناه إن الاقتصاد في أزمة؟
الحقيقة لأ خالص .. تقليل استثمارات البنوك في أذون الخزانة مش بالضرورة مؤشر سلبي.. أولًا.. البنوك بتدور دايمًا على أفضل الطرق لتوظيف سيولتها.. ووديعة البنك المركزي كانت خيار أكتر مرونة خصوصًا في ظل الظروف الاقتصادية الحالية.
ثانيًا.. جزء كبير من سيولة البنوك بيتحول للإقراض.. وده معناه إن البنوك بتلعب دورها الحقيقي في دعم الاقتصاد من خلال تمويل المشروعات الصغيرة و المتوسطة والصناعات الكبيرة.
على الناحية التانية استثمارات الأجانب في أذون الخزانة قفزت 382% ووصلت لـ1.87 تريليون جنيه.. وده مؤشر إيجابي لأنه بيعكس ثقة المستثمرين الأجانب في الاقتصاد المصري.. لكن السؤال هنا هل اعتمادنا على استثمارات الأجانب في الدين الحكومي ممكن يكون خطر على المدى البعيد؟ خصوصا ان دي أموال ساخنة ممكن تخرج بشكل مفاجيء فى أي وقت.
الخلاصة.. إحنا قدام إعادة ترتيب أوراق مش أكتر. البنوك مش بتقلل من استثماراتها عشان خطر لكنها بتدور على بدائل أكتر ربحية وفي نفس الوقت الاقتصاد المصري بيستفيد من دخول مستثمرين أجانب.
