قبل أول اجتماع لحسم الفائدة.. هل تخرج رؤوس الأموال من البورصة وتتجه للبنوك؟
يا ترى إيه المتوقع بالنسبة لأسعار الفايدة في الفترة الجاية، هل هيلجأ البنك الفيدرالي الأمريكي لخفض الفايدة في ولا هيثبتها ولا ممكن يحصل رفع جديد، وإيه تأثير القرار ده على الاقتصادات والأسواق والبورصات المحلية زي السوق المصري.
في الفترة الحالية، المستثمرين ورجال الأعمال بيترقبوا قرارات البنوك المركزية لحسم الفايدة، واللي هتنعقد في الأيام الجاية، ومتوقع إن البنك الفيدرالي الأمريكي وكمان البنك المركزي المصري، ياخدوا قرارات جريئة بخصوص الفايدة.
عشان كده، كتير من الخبراء اتوقعوا اتجاه البنوك المركزية لخفض أسعار الفايدة، عشان في المقابل يتابع المستثمرين في البورصة حركة التداولات في سوق المال.
طب يا ترى إيه اللي ممكن يحصل في البورصة المصرية الأيام الجاية في حالة خفض الفايدة؟
بص يا سيدي، دلوقتي البورصة المصرية، بتشهد هدوء في التداولات، وده حصل مع بداية السنة الجديدة 2025، ومع تكرار الإجازات خلال شهر يناير الحالي، وبسبب ده اتأثرت أحجام وقيم التداولات بشكل كبير، وده في حد ذاته بيطرح سؤال مهم وهو "هل ممكن هتتجه فلوس البورصة المصرية للبنوك والاستثمار في الشهادات الادخارية قريب؟ .
في الحقيقة، الوضع الحالي بيقول إن صعب جدا تتحول الفلوس من البورصة المصرية للبنوك ، خاصة وإن أغلب التوقعات بتؤكد إن البنك المركزي المصري، هيخفض أسعار الفايدة بمعدلات كبيرة في أول اجتماع له في شهر فبراير الجاي، فبالتالي البورصة هتفضل محافظة على مكسبها.
كمان، صناديق الاستثمار الأجنبية، بتشير لبيع العقود الآجلة للدولار، ومع توقعات خفض أسعار الفايدة، فممكن جدا تتجه الفلوس دي لأسهم البورصة، وبالتالي البورصة تحقق عائد أعلى من الشهادات وأذون الخزانة.
كمان، ممكن جدا يحصل العكس، وهو خروج الفلوس من البنوك وخاصة من الشهادات، وتتجه للبورصة المصرية عشان تحقق أكبر عائد لها خلال الفترة الجاية.
ومع ذلك، فكل التوقعات بتشير لأن الفيدرالي الأمريكي يبقي على سعر الفائدة، بدون تغيير في الاجتماع الجاي، لكن بالنسبة لمصر، فالتوقعات رايحة على قرار البنك المركزي بخفض سعر الفايدة بين 2% و4% في أول اجتماع للجنة السياسة النقدية في 2025، وده عشان يدعم القطاع الخاص بشكل كبير في الفترة الجاية.
والخلاصة، إن بعد قرار أسعار الفايدة الجديدة، البورصة هتفضل محافظة على مكاسبها بشكل كبير وهتفضل الحصان الرابح للمستثمرين، والأيام الجاية هتثبت الكلام ده.
