خط ملاحي جديد بين مصر والسنغال.. شوف المكاسب الاقتصادية من المشروع
يا ترى إيه قصة الخط الملاحي الجديد اللي هتنفذه مصر بالتعاون مع دولة السنغال قريب، ليه المشروع ده ظهر دلوقتي، وإيه هي وجه الاستفادة منه، هل هيقدر يوفر دولار للبلد ويسد احتياجاتنا من العملة، ولا هيكون ممر خدمي للصادرات والواردات المصرية للأسواق الأفريقية، وامته هنشوف الكلام ده حاصل على أرض الواقع.
طبعا الموقع الجغرافي الفريد لمصر، والمزايا الكتيرة اللي بتتمتع بيها، خلاها تكون نقطة التقاء ومرور على خطوط الملاحة العالمية، خاصة إننا عندنا أقوى ممر ملاحي في العالم، وهو قناة السويس.
عشان كده، الدولة أو الحكومة بتفكر تحول الموانىء المصرية إلى موانئ محورية، عشان تزود حصة مصر من السوق العالمية لتجارة الترانزيت، وكمان تقدر تساعد في فتح أسواق جديدة للصادرات المصرية في الخارج، من خلال تشغيل خدمات ملاحية مباشرة.
ونقدر نقول، إن مصر فيها 4 من أكبر خمس خطوط ملاحة عالمية، شغالة في المواني المصرية، وهي ميرسك وهاتشيسون وCMA وهاباج لويد، عشان كده كل دول العالم نفسها تتعاون مع مصر في النوع ده من الاستثمار.
ومن ضمن الدول دي، هي السنغال، اللي اقترحت على الحكومة المصرية في الأيام الأخيرة، وتحديدا على وزير النقل، تشغل خط ملاحي بين الإسكندرية وداكار.
ومن هنا، رحبت مصر بالمقترح ده، وأكدت أننا على استعداد تام لتدريب العاملين فى مجال الموانئ بالسنغال في كل مجالات النقل البحرى وتشغيل وإدارة الموانئ دي، خاصة وإن في توجيهات من الرئيس عبدالفتاح السيسى، بزيادة حجم التعاون مع الدول الإفريقية، ومشاركة تجربة مصر مع أشقائها فى مجال تطوير المواني.
والكلام ده معناه، إن في مشروعات كتيرة في مجال المواني هتربط مصر مع السنغال والدول الإفريقية، واللي هيكون لها مكاسب اقتصادية كتيرة زي إنها هتسهل وصول صادراتنا وواردتنا لها من ناحية، وكمان هتكون الدول دي محطاتنا للوصول للأسواق العالمية.
كمان، مصر دلوقتي في المرتبة 57 عالمياً في مؤشر الأداء اللوجيستي، وقفزت 10 مراكز مرة واحدة، وده كان سبب في إن دول كتير تكون مهتمة تتعاون معانا في الملف ده، وبالتالي العجلة تدور والاستثمارات تزيد.
غير كده، مينا بورسعيد بيجي في المركز الـ 16 ضمن أفضل 20 ميناء حاويات أداء في العالم، ووصلت الطاقة الاستيعابية للموانئ البحرية المصرية لأكثر من 184.2 مليون طن طاقة، وحوالي 9 مليون طن حاوية.. فكل دي كانت مؤهلات قوية تخلي أي دولة في العالم، عايزة تتعاون مع مصر في مجال الخطوط الملاحية، اللي بتعتبر كنز دولاري لمصر وأي بلد تانية.
