غول دولاري ينتفض من جديد.. شوف مصر هتعمل إيه لجذب السياح من كل دول العالم
السياحة الوافدة لمصر هتكون كنز، والدولارات اللي هتدخل مصر من قطاع السياحة والآثار هتكون كتيرة جدا.. ياتري اية خطة الحكومة لزيادة الاقبال السياحي لمصر.. ومصر مستهدفه توصل لكام سائح السنة دي.
من فترات طويلة والحكومة بتعد قطاع السياحة علشان يكون الجرار اللي بيشد الدولة المصرية خصوصا أن ايراداته بتكون سهلة ومباشرة وبتدخل خزينة الدولة المصرية قبل ما السائح يطلع من بلده ويوصل مصر، وفي الحالة دي تقدر مصر تتصرف في الفلوس زي ما تحب، سواء بقي خصصتهم للقطاعات الخدمية أو خطط الاستثمار أو اي حاجة في الدولة .
طيب مصر هتعمل اية في قطاع السياحة في 2025.
كل المؤشرات بتقول أن حركة السياحة الوافدة لمصر في 2025 هتكون مختلفة تماما خصوصا مع عودة الهدوء النسبي للصراع في منطقة الشرق الأوسط واللي اثر بنسبة كبيرة علي حركة السياحة الوافدة لمصر ، وده علي الرغم من الرقم القياسي اللي حققته مصر في 2024، واللي وصل لـ15 مليون سائح وتحقيق رقم قياسي جديد من ايرادات القطاع واللي وصل لـ15 مليار دولار، ولولا الصراعات اللي موجودة في منطقة الشرق الأوسط كانت الارقام اللي هيحققها قطاع السياحة والأثار هتكون غير كده تماما وهتكون اعلي من كده بكتير .
الدولة من فترات طويلة بدأت تستعد لـ2025، وبدأت تعلن عن حاجات أولية لجذب انظار العالم لزيارة مصر، وأول الحاجات دي هي إعلان مجلس الوزراء عن افتتاح المتحف المصري الكبير بشكل رسمي خلال العام الحالي، والمتحف ده كل الناس حوالين العالم في انتظار الموعد النهائي للافتتاح خصوصا أنه هيضم عدد كبيرة من القطع الآثرية اللي هتعرض مع بعضها في مكان واحد واللي هيوصل عددها لأكثر من 50 الف قطعة اثرية، ده غير كمان أنه هيعرض لأول مرة اثار الملك الذهبي توت عنخ أمون واللي بيوصل عددها لأكثر من 5 الاف قطعة اثرية هتعرض مع بعضها في قاعة واحدة من وقت اكتشافها في 1922 علي يد العالم الأنجليزي هوارد كارتر.
مجلس الوزراء من دولوقتي بدأ يناقش مع الشركة المنفذه لحفل الافتتاح تفاصيل العروض اللي هتحصل يوم الافتتاح، والدكتور مصطفي مدبولي رئيس مجلس الوزراء أكد أنه حفل الافتتاح هتكون حاجة مبهرة تليق بمكانة مصر السياحية والأثرية، ومش هيكون اقل من حفلي نقل المومياوات الملكية وافتتاح طريق الكباش بالأقصر واللي ابهروا العالم كله وكانوا وسيلة مهمة جدا في الترويج السياحي لمصر في الخارج، وبعدهم عدد السائحين الوافدين لمصر تضاعف مرات المرات عن الاعداد اللي كانت بتنزل مصر في الفترات اللي فاتت.
الدكتور مصطفي مدبولي قال أن حفل افتتاح المتحف المصري الكبير مش هيكون يوم واحد، وهيكون علي كذا يوم، وأول يوم هيكون مخصص لرؤساء الجمهوريات والملوك اللي هيحضروا الحفل، واليوم الثاني لرؤساء مجالس الوزارات، والثالث للوزراء، والرابع للمشاهير ورجال الأعمال.
