البنوك عملت حاجة كويسة في توقيت صعب.. إيه حكاية القروض غير المنظمة؟
يا ترى إيه هي القروض غير المنتظمة في البنوك؟ وليه البيانات والتقارير بتشير الى انها بتتراجع الفترة الأخيرة؟ وإيه تأثير ده على الاقتصاد بشكل عام؟
الربع التالت من 2024 شهد تراجع كبير في نسبة القروض غير المنتظمة في البنوك المصرية.. فايه هي بقا القروض غير المنتظمة دي؟ وازاي البنوك بتتعامل معاها؟
القروض غير المنتظمة. ببساطة هي القروض اللي الناس مش قادرين يسددوا أقساطها في المواعيد اللي متفق عليها.. يعني ببساطة القروض اللي فيها تعثر.
مع دخول 2024 نسبة القروض غير المنتظمة في البنوك انخفضت ووصلت إلى 2.4%.
طب إيه السبب؟ ليه حصل التراجع ده؟
لازم نعرف إن البنوك في الفترة الأخيرة كانت حذرة جدًا في منح الائتمان.. يعني بدل ما كل واحد يروح ياخد قرض على طول البنوك بقت أكتر حذرًا في تحليل ملفات العملاء.. ولازم العميل يكون سجله الائتماني كويس عشان البنك تسمح ليه بالحصول على قرض وتكون ضامنة انه هينتظم فى سداده.
لكن الموضوع مش بس كده.. في أسباب تانية زي إن البنوك بدأت تشتغل على تسديد الديون المتعثرة وده ساعد على تقليل نسبة القروض غير المنتظمة.. يعني بدل ما البنوك تترك الديون تتراكم بدأت تبيعها أو تعيد هيكلتها.
طب هل ده شيء إيجابي للاقتصاد؟
أكيد.. لأن التقليل من القروض غير المنتظمة يعني إن البنوك هتكون أكثر أمانًا وده بيخليها مستعدة تمنح قروض جديدة للشركات والمستثمرين وكمان ده هيدعم استقرار القطاع المصرفي.
كمان من العوامل الإيجابية استقرار سعر الصرف في الفترة الأخيرة.. بعد ما كان فيه ارتفاع في الدولار بشكل غير طبيعي دلوقتي الوضع بدأ يتحسن وده بيقلل الضغط على البنوك وشجع الشركات على سداد أقساطها وقلل نسبة القروض المتعثرة.
ومع تحسن الظروف الاقتصادية و استعادة الشركات لنشاطها وبداية فتح أبواب الاستيراد كل ده ساعد على زيادة قدرة الشركات على سداد الديون.. بمعنى تاني .. مع تحسن الظروف، الشركات قدروا يسددوا وبالتالي القروض غير المنتظمة قلت.
لكن هل ده معناه إن الوضع ممتاز؟
لأ لسه قدامنا تحديات..و أهم تحدي هو أسعار الفائدة المرتفعة.. رغم أن الفائدة المرتفعة ساعدت على تقليل التضخم لكن صعوبة الحصول على التمويل يعني إن بعض الشركات مش قادرة على التوسع أو تنفيذ مشروعات جديدة.. خاصة في القطاعات زي السياحة أو الزراعة أو الصناعة اللي مش قادرة تتحمل تكلفة الاقتراض.. وفي المقابل القطاعات النشطة زي العقارات والمقاولات بقت قادره على التعامل مع الفوائد المرتفعة وده خلّى البنوك تركز على تمويل القطاعات دي بشكل أكبر.
ونقدر نقول ان تراجع القروض غير المنتظمة إشارة إيجابية لكن لسه فيه تحديات كبيرة لكن مش دايمًا في أوقات زي دي لازم ننتظر تحسن مستمر.
