مصر بتخطط لحاجة كبيرة في ملف الغاز.. يا ترى ممكن تتحقق؟
يا ترى إيه سر زيادة إنتاج مصر من الغاز، والهدف ده اتحقق ولا لسه، وهل الحكومة ممثلة في وزارة البترول ممكن تحقق المعادلة الصعبة بأنها تقدر تحقق اكتفاء ذاتي من الغاز دايما وتحول مصر لمركز إقليمي للطاقة.
في الأيام الأخيرة، تم الإعلان عن حدوث زيادة في إنتاج الغاز الطبيعي المصري، وده حصل بعد ما شركة "بريتيش بتروليوم" البريطانية، اللي شغالة في البحث والتنقيب عن الغاز الطبيعي، أعلنت عن بداية حفر حقل ريفين البحري التابع لها على السواحل البحرية المصرية.
كمان، شركة "شل" هتبدأ هي كمان في تشغيل بيرين جدد، ضمن الآبار ال3 اللي تم البدء في حفرها في أواخر عام 2024، وكل ده طبعا هيوفر لمصر زيادة في إنتاج الغاز الطبيعي.
ونقدر نقول، إن وكالة "مييز" العاملة المتخصصة في مجال أبحاث وتقارير البترول والغاز الطبيعي عالميا، قالت إن شركة بريتيش بتروليوم، حفرت بيرين في حقل ريفين قبالة شاطئ الإسكندرية في البحر المتوسط، وكأنها بتشهد على إنجاز عالمي جديد بيحصل على أرض مصر.
ومن هنا، ردت وزارة البترول والثروة المعدنية المصرية، وأكدت إن أنشطة التشغيل تحت سطح البحر مستمرة، مقرر إن يتم إنتاج 200 مليون قدم مكعب يوميًا من الغاز الطبيعب الشهر الجاي.
كمان، توقعات زيادة إنتاج الغاز الطبيعي في مصر هتوصل ل 600 مليون قدم مكعب يوميا من مشروع غرب دلتا النيل، كل دي ثروة قومية مش كتير يعرف فايدتها للاقتصاد المصري وانعكاسها على حياة المواطن البسيط وكمان على انخفاض الأسعار.
خد عندك كمان، إن إنتاج شركة "شل" بالفعل وصل 86 مليون قدم مكعب يوميًا من مشروع غرب الدلتا العميق البحري (WDDM)، عشان يوصل إجمالي الإنتاج إلى 286 مليون قدم مكعب يوميا.
ومع بداية تشغيل 2 من الآبار ال3 اللي تم حفرها السنة اللي فاتت، فهنقدر نوصل لمعدلات إنتاج عالمية لأن دخول حقول الغاز الجديدة لخطة الإنتاج، هيعزز ثروتنا من الغاز الطبيعي، والكلام ده معناه، إن من المقرر تحصل زيادة قدرها 160 مليون قدم مكعب من إنتاج الغاز الطبيعي قريب جدا.
ولو حضرتك ماتعرفش فوايد زيادة إنتاج الغاز الطبيعي في مصر، فنقدر نقولك إنه ثروة قومية لأنه بيدخل في كل مجالات الحياة اليومية، سواء كوقود أو في مجالات تانية.
ضيف على ده، إن زيادة إنتاجنا من الغاز هيخلي مصر في حتة تانية خالص، يعني هيأمن احتياج السوق المحلي للغاز، وهنقدر تواكب معدلات النمو، لأنه بيستخدم في النشاط الاقتصادي وبيغطي تكاليفه وبيحقق ربح كمان، وبرضو هنقدر نوفر فرص عمل كتيرة، وهتتحول مصر لمركز إقليمي للطاقة.
