38 مليار دولار ودرس 2022.. ليه الأموال الساخنة مبقتش خطر
هو ليه فيه ناس قلقانة من الأموال الساخنة وازاي الحكومة مش هتوقع في فخ 2022 وتكون جاهزة لاي سيناريو مفاجيء وايه حكاية المليارات اللي دخلت السوق المصري في الفترة الأخيرة.
الأرقام الرسمية بتقول إنه حصلت زيادة غير مسبوقة في تدفق الاستثمار الأجنبي غير المباشر في أذون الخزانة المحلية المصرية وطبعا دي حاجة بتعكس زيادة ثقة الأجانب في استقرار سعر الصرف وجاذبية العائد المقدم على الجنيه مقارنة بالدولار وخلال أول 8 شهور من تحرير سعر الصرف السوق المصري جذب 24.554 مليار دولار تدفقات من الاستثمار الأجنبي غير المباشر واللي بيطلق عليها "الأموال الساخنة" وقفز إجمالي الرصيد إلى مستوى قياسي وسجل 38.171 مليار دولار بنهاية أكتوبر اللي فات مقارنة بـ 13.617 مليار دولار في فبراير اللي فات.
طيب ليه أطلقوا علي الأموال اللي بتستثمر في أذون الخزانة اسم الأموال الساخنه ؟
لأنه ببساطة الاموال دي سريعة الهرب من الأسواق وبتعتمد على الاستثمار السريع وعشان كده بتشتغل في أذون الخزانة والسندات بمدد معلومة ومش بتعمل مثلا استثمار طويل الأجل زي بناء مصانع أو عمل مشروعات مستدامة ودائما الأموال الساخنه اسمها بيرتبط بالمخاطر والضغوط المتوقعة على سعر صرف العملات المحلية مقابل الدولار وباقي العملات الأجنبية في حال خروجها بشكل مفاجيء بسبب وقوع أزمات مفاجئة بالمنطقة أو العالم بما يؤثر في زيادة الطلب على العملة الأجنبية وارتفاع سعرها ودا اللي حصل قبل كده لو فاكرين في 2022.
طيب ليه المرة دي الوضع مختلف ومليارات الأموال الساخنه بقت خطر اووي ؟
كتير من المصرفيين قللوا من المخاطر المتوقعة على حركة سعر صرف الجنيه منها في حال خروج الأموال الساخنه ودا لأن الحكومة المصرية والبنك المركزي المصري وخدين بالهم المرة دي كويس أوووي من خريطة تحرك الأموال الساخنة وفي نفس الوقت عندها رصيد دولاري كبير يخليها تسد اي فجوة دولارية ممكن تحصل بالخروج المفاجئ للاستثمارات الساخنة ويخليها متكررش اللي حصل في سنة 2022 واللي حصل فجأة ونتيجة لظروف خارجية وصراعات دولية وساعتها حصلت ازمة السوق السودا مع نقص المعروض من الدولار بعد خروج حوالي 22 مليار دولار أموال ساخنة في مدة زمنية قصيرة جدا.
وبالعكس خبراء الاقتصاد شايفين المرة دي أن زيادة تدفق الاستثمار الأجنبي في أذون الخزانة مهم جدا وبيعكس زيادة جاذبية العائد المقدم على الجنيه المصري مقارنة بالدولار وزيادة الثقة في استقرار سعر صرف الجنيه مقابل باقي العملات الأجنبية وإن تراجع العائد على الدولار السنة اللي فاتت زاد من بريق العائد المقدم على الجنيه عند المستثمرين الأجانب وزيادة دخولهم للاستفادة من سعر الفائدة المرتفع.
وخلال 2024 وصل العائد على أذون الخزانة المحلية إلى 32% قبل خصم الضريبة قبل أن يهبط إلى 27% خلال آخر عطاء بدعم من زيادة إقبال المستثمرين لشراء أذون خزانة وتراجع معدل التضخم وعلى فكرة الاستثمار الأجنبي غير المباشر بيعتبر مورد مهم من موارد النقد الأجنبي لأي دولة ولا يمكن الاستغناء عنه بشرط استخدامه بشكل إيجابي لتجنب أي مخاطر غير متوقعة.
وعادة البنوك بتستعين بالأموال الساخنة في تمويل بعض المعاملات قصيرة الأجل زي سداد بعض الاعتمادات المستندية أو تداولها في سوق الإنتر بنك بين البنوك أو سداد بواصل تأمينية أوتغذية صافي الأصول الأجنبية وبدون استخدامها لتمويل التزامات طويلة الأجل تجنبا لانعكاساتها السلبية على سعر الصرف لو حصل خروح مفاجئ للأموال الساخنة.
الخلاصة الوضع مختلف المرة دي في سوق أذون الخزانة المصري واللي بقى جاذب بشكل كبير للمستثمرين الأجانب بسبب العائد الكبير خاصة بعد خفض الفدرالي الأمريكي للفايدة
ورغم كده دخول وخروج الاستثمار الأجنبي غير المباشر بيكون ليه انعكاس مباشر على تحرك سعر الصرف للجنيه مقابل باقي العملات سواء بالصعود أو الهبوط وفق العرض والطلب وعشان كده بنشوف ساعات تحرك مفاجئ في سعر الدولار وزيادة تدفق الأموال الساخنه بيساعد في ترجع سعر صرف الدولار.
