الاقتصاد الأخضر هيعمل قلبان في مصر.. هنقولك إزاي الدولة بتحضر نفسها؟
مصر حاليا بتعمل ثورة في عالم الاستثمار في الطاقة النظيفة والثورة دي هتوفر مليارات الدولارات.. وكمان هتدخل لمصر ملايين بالكوم.. ياتري اية حكاية الثورة دي.. وازاي مصر هتستفاد منها ماليا.
الأزمة اللي الدولة كانت فيها علي مدار السنة اللي فاتت واللي عانت فيها الدولة من تخفيف الاحمال وقطع الكهرباء علي كل محافظات الجمهورية واللي للاسف قعد مكمل معانا اكثر من سنة كاملة، واللي متحلش الا لما الدولة اتخدلت وللاسف اضطرت أنها تخصص مبالغ دولارية كبيرة لاستيراد الوقود اللي بتجتاجه محطات توليد الكهرباء علشان تفضل شغالة وتولد الكهرباء المطلوبة للأنارة علي مدار الـ24 ساعة.
مشكلة قطع الكهرباء خلت الحكومة يكون تفكيرها مختلف خصوصا في ظل توجيهات القيادة السياسية بتختفيف الضغط علي الدولار وتقليل الاستيراد وزيادة التصدير، والكهرباء في الفترة الاخيرة بقت قطاع مستهلك وبياخذ مبالغ دولارية كبيرة من خزينة الدولة المصرية وطبعا كلها بالدولار علشان الدولة توفر البترول والغاز الطبيعي اللي محطات توليد الكهرباء بتحتاجه علشان تفضل مستمرة وشغالة علي مدار الـ24 ساعة، وعلشان كده الحكومة بدأت تفكر في مصادر تكون مش مكلفة وتكون مستمرة وكمان نعتمد عليها في التصدير، وتكون بديل عن الاستيراد، وكان التفكير في استغلال الموارد الطبيعية اللي مش بتخلص واللي هيا حاجة من عند ربنا وهما الشمس والهواء وفي أكثر من منطقة في مصر متوفر فيها الشمس بدرجة سطوع عالية جدا زي أسوان والهواء بدرجة مستمرة زي الزعفرانة وخليج السويس ومناطق تانية كتيرة.
طيب اية اللي عملته الدولة علشان تستغل الطاقات الجديدة والمتجددة؟.
في الكام شهر اللي فاتوا الحكومة فتحت باب الاستثمار قدام شركات القطاع الخاص للدخول لمصر والاستثمار في مجال الطاقة الجديدة والمتجددة، وفعلا في شركات كتير قدمت طلبات للحكومة للدخول والاسثتمار في مشروعات توليد الكهرباء من الشمس والرياح والدولة حطت خطة للوصول بالطاقات المتجددة إلى 42% من إجمالي الطاقة المولدة في 2030 ، وهنوصل لـ65% من حجم الطاقة المولدة في 2040 .
الخطة اللي حطتها الحكومة للتحول للطاقة النظيفة، اعتمدت علي اعادة بناء البنية التحتية في قطاع الكهرباء وتعديل التشريعات لدخول القطاع الخاص للاستثمار في الطاقة النظيفة وبقت مصر واحدة من أكثر الدول الجاذبة للاستثمار، وبنهاية 2026 هتوصل القدرات الجديدة من الطاقات المتجددة لـ 12 ألف ميجاوات من الطاقات المتجددة، ده غير 3 الاف و 350 ميجاوات من بطاريات تخزين، وبنهاية 2029 الدولة بستهدف الوصول لـ 20 الف ميجاوات من الطاقات المتجددة، 3600 ميجاوات من الطاقة النووية النظيفة و2400 ميجاوات من الضخ والتخزين.
خطة الدولة للتحول للطاقة النظيفة بتستهدف كمان خفض انبعاثات الكربون، وخفض الاعتماد على الوقود الأحفوري وتوفير الموارد المائية المخصصة لاستيراد وقود محطات التوليد واللي هيوصل لـ 269 مليون دولار وفرا سنويا، الدولة هتوفر من استيراد وشراء الوقود والغاز الطبيعي المخصص لتشغيل محطات توليد الكهرباء.
