لو عاوز تعرف الدولار رايح على فين الأيام الجاية .. شوف التقرير ده
ليه الدولار رجع ينزل تاني في البنوك وايه مصير الأسعار في الفترة الجاية وهل العملة الأمريكية هترجع تزيد تاني.. تعالو نشوف اصل الحكاية.
لو متابعين سوق الدولار في البنوك هنلاقي إن السعر وصل لارتفاعات كبيرة لحاجز ال51 جنيه ودي كانت أكبر زيادة بعد قرار التعويم في مارس اللي فات وبتقول كانت عشان السعر رجع ينزل تاني وسجل النهاردة في البنك المركزي مثلا 50.44 جنيه فياتري ليه.
شوف حضرتك سعر الدولار محدش بيتحكم فيه غير السوق والعرض والطلب ولما تلاقي سعره رفع يبقي فيه طلب كبير على الدولار والعكس صحيح وعشان كده كل يوم هتلاقي إن السعر بيتغير سواء بالهبوط أو الزيادة والأهم زي ما بيقول أهل البنوك أن يكون فيه وفرة في العملة الأمريكية مش سعر الدولار..
ونرجع لسؤالنا بخصوص أسباب تراجع سعر الدولار هتلاقي فيه اكتر من حاجة منها تحسن كل المؤشرات الاقتصادية وخاصة القطاعات اللي ليها علاقة بالدولار زي السياحة مثلا واللي حققت رقم قياسي لأول مرة في تاريخها ب15 مليار دولار ودا غير الارتفاع الكبير في الصادرات غير البترولية وولللي وصلت ل40 مليار دولار.
ومن بين الأسباب كمان الزيادة الكبيرة في حجم الاستثمارات الأجنبية والعربية تحديدا في السوق المصري واللي وصلت 21 مليار دولار خلال الربع الأخير من العام المالي اللي فات ووصل إجمالي استثمارات الدول العربية لمصر خلال العام المالي نفسه 39.448 مليار دولار مقابل 4.3 مليار دولار بنهاية العام المالي السابق..
وكمان تدفق تمويلات خارجية جديدة والمرة دي من الاتحاد الأوروبي واللي سلم مصر مليار يورو لدعم الاقتصاد المصري وسط الأزمة وده وفر سيولة في العملة الصعبة وساعد البنك المركزي إنه يتحكم في الطلب على الدولار وكمان اقتراب مصر من استلام مبلغ الشريحة الرابعة من قرض صندوق النقد الدولي بقيمة 1.2 مليار دولار.
ومن بين اسباب تراجع الدولار القفزة القياسية في تحويلات العاملين في الخارج واللي قفزت في أول 10 شهور من 2024 بنسبة 45% لتصل إلى 23.7 مليار دولار مقارنة بـ 16.3 مليار دولار في الفترة نفسها من السنة اللي فاتت ..
وكل ده بيقول إن سعر الدولار تحت السيطرة وهينزل كل ما المؤشرات دي زادت.
