البنك المركزي نجح في الاختبار الصعب.. أرقام تاريخية تؤمن احتياجات مصر في “زمن الأزمات”
إزاي مصر قدرت تخلي احتياطيها النقدي في البنك المركزي يوصل لأعلى رقم في تاريخه وده معناه إيه ليك كمواطن أو مستثمر؟ والأهم الخطوة الجاية في الاقتصاد هتكون إيه؟
في خبر هزّ الوسط الاقتصادية كله .. البنك المركزي المصري أعلن مؤخرا إن الاحتياطي النقدي ارتفع بشكل كبير وحقق أرقام قياسية.. أرقام بتعكس قوة ومرونة الاقتصاد المصري وسط التحديات العالمية.
طب إيه اللي خلانا نوصل للنقطة دي؟ وده هيفرق إزاي في حياتنا اليومية؟
خلينا نحط الأرقام قدامان ونحكم .. بص يا سيدي الاحتياطي النقدي وصل في آخر تقرير لـ 46.3 مليار دولار.. ومقارنة بالسنة اللي فاتت.. الرقم ده زاد بشكل واضح بفضل تحركات كبيرة في الاقتصاد.
كمان معدلات النقد الأجنبي اللي داخلة البلد زادت من مصادر متنوعة زي السياحة تحويلات المصريين من الخارج وقوة الصادرات.
طيب، إيه أهمية الرقم ده؟
الاحتياطي النقدي بالنسبة لأي دولة زي خزنة الأمان اللي بتحمي اقتصادها من الصدمات.. وبتدّي رسالة واضحة للعالم "احنا مستقرين ومسيطرين".
وطبعا اللى اتحقق ده كان ليه أسباب أهمها .. زيادة السياحة.. بعد فتح السوق المصري بشكل أكبر للسياحة الأعداد رجعت تزيد.. و السياحة لوحدها بقت واحدة من أكتر القطاعات اللي بتضخ عملة أجنبية في الاقتصاد.
كمان بفضل جهود تشجيع الصناعة المحلية.. مصر زودت صادراتها بشكل كبير.. وده ساعد في زيادة العائدات الدولارية.
كمان حثل نمو كبير فى تحويلات المصريين بالخارج.. وخد بالك مصر دايمًا بتعتمد على تحويلات العاملين في الخارج ودي واحدة من أهم مصادر العملة الأجنبية.
كمان مؤخرا الخطط الحكومية الأخيرة لتشجيع الاستثمار الأجنبي والمحلي بدأت تجيب نتائج إيجابية على الأرض.
طب ليه ده مهم؟ ةإيه تأثيره عليك؟
أول حاجة هتحصل هي استقرار الأسعار.. زيادة الاحتياطي النقدي معناها إن الحكومة عندها قدرة تتحكم في سوق العملة وتقلل الضغط على الجنيه.. والنتيجة استقرار الأسعار ومعدلات التضخم.
كمان لما المستثمرين يشوفوا احتياطي نقدي قوي.. ده بيعزز ثقتهم في السوق المصري.. وده معناه مشاريع أكتر وظائف أكتر وفرص أكتر لينا كلنا.
كمان زيادة الاحتياطي أمان وقت الأزمات.. سواء كانت أزمة عالمية زي ارتفاع أسعار البترول أو مشاكل في التجارة الدولية .. وجود احتياطي نقدي قوي بيساعدنا نتخطى أي أزمة من غير ما ننهار.
و طالما استمرينا في السياسات الاقتصادية الذكية اللي بتشجع الاستثمار وتدعم الإنتاج المحلي فإحنا في الطريق الصح.. لكن لازم نفضل مركزين على التحديات اللي ممكن تواجهنا زي إدارة معدلات التضخم بشكل فعّال.
