ملايين الأفدنة الجديدة.. الزراعة إنجاز ضد مقاييس الزمن
إيه اللي بيحصل في قطاع الزراعة المصرية وإزاي الصحرا بقت خضرا وإزاي مصر كلمتها بقت من راسها بعد ما زرعت لقمتها.
مصر رغم إن النيل بيشق أرضها نصين من أسوان لرشيد لكن أغلب أرضها صحرا وحتى الرقعة الزراعية القديمة على ضفاف النيل بدأت تتآكل بسبب الزحف العمراني والتعديات وفي نفس الوقت غياب التخطيط الحقيقي لاستراتيجية وطنية في مجال الزراعة وعشان كده تراجع نصيب الفرد من الأراضي الزراعية بشكل كبير عن المعدل العالمي في بلد عدد سكانه لأكتر من 110 مليون نسمة.
لما تولى الرئيس السيسي الحكم في 2014 ملف الزراعة عنده خد بعد أمن قومي واستراتيجي لأن من لم يملك قوته لم يملك قراره ولأن مصر كانت بدأت خطط جديدة لتوسيع وتقوية أدوات القوة عندها أو انها ترجع دولة بحجم تاريخ مصر وعشان كده ملف الزراعة تم العمل فيه بالتوازي مع مشروعات البنية الأساسية اللي بدأت في كل القطاعات الاقتصادية التانية ولأول مرة يتم استصلاح 4.5 مليون فدان في زمن قياسي.
ناس كتير متعرفش أن الزراعة هي عصب الاقتصاد المصري لأنه المصدر الرئيسي للطعام والسلع الأساسية والصناعات الزراعية من اول المكرونة والارز والسكر والزيوت والفول والعدس وغيرها بخلاف المخبوزات والخضروات والحبوب وصولا البتلو واللحوم والدواجن لأنها قطاعات بتعتمد على الزراعة في تربيتها وقطاع الزراعة بيمتد لقطاع الري والأسمدة ومستلزمات الزراعة زي الآلات والتجهيزات الفنية والصرف الزراعي والتسويق والنقل يعني قطاع واسع جدا وبيضم تفاصيل اكتر وفي نفس الوقت التوسع فيه مسألة حياة أو موت ومصر بتسابق الزمن بمشروعات عملاقة عشان تحقق الاكتفاء الذاتي من كل الزراعات وكفاية نعرف أن حجم المشروعات الزراعية في عهد الرئيس السيسي زادت عن مساحة 4 محافظات بحسب تصريحات الرئيس السيسي الأخيرة والمشروعات دي هي اللي قفزت بالانتاج الزراعي وتصدرت بيه مصر الدول العربية في إنتاج القمح مثلا.
وخلينا نأكد أن عملية استصلاح الأراضي عملية مش سهلة إطلاقا لأنها بتحتاج إمكانيات مادية ضخمة وكفاية تعرف إن مصر في عهد السيسي صرفت اكتر من 64 مليار جنيه في الفترة. من 2014 إلى 2023 على المشروعات الجديدة ووصل قيمة الناتج المحلي لقطاع الزراعة والغابات والصيد خلال 2021-2022 لحوالي 858 مليار جنيه مقارنة ب241 مليار جنيه في الفترة بين 2013-2014 ووصل حجم الصادرات الزراعية لأكتر من 7 مليون طن ودا غير 7 مليار تمويل لمشروع البتلو لـ 41 ألف مستفيد بـ 461 ألف رأس ماشية.
طبعا زيادة الرقعة الزراعية معناه زيادة مصانع المنتجات الزراعية وضخ استثمارات جديدة وتوفير مليارات الدولارات اللي بتدفعها الدولة كل سنة في استيراد السلع الغذائية وفيه حاجة مهمة جدا قالها الرئيس السيسي في ملف الزراعة وهي مشاريع كتير يادوب خلصت أو على وشك الانتهاء منها ولسه خيرها جاي والناس مشفتهوش وإنه في الفترة الجاية الناس هتشعر بثمار المشروعات دي في الأسواق وفي الأسعار وفي التصدير وغير دا كله إن مصر أمنت احتياطياتها الاستراتيجية من الغذاء من خلال المشروعات الجديدة وبالتالي عززت أمنها القومي وسط التوترات اللي حولينا واللي بتنعكس على سلاسل الإنتاج العالمية.
