اللي يقولك مصر بتبني كباري وبتعمل طرق كتير ليه؟ خليه يشوف التقرير ده
كل ما تمشي في أي مكان هتلاقي كبري جديد بيتعمل.. جملة أكيد سمعتها أو يمكن قولتها بنفسك في يوم من الأيام. يا ترى ليه مصر بتعمل كل الكباري والطرق دي؟ وإيه حكاية المشاريع اللي كل يوم السيسي بيطلقها في كل مكان في مصر؟ لو عايز تعرف السر وراء كل الشغل ده.
خلال السنين اللي فاتت.. وتحديدًا من وقت تولي الرئيس عبدالفتاح السيسي حكم مصر.. وفي إطار تأسيس الجمهورية الجديدة.. الدولة نفذت كمية ضخمة من المشاريع في قطاع النقل والبنية التحتية.
تقريبًا مفيش قرية أو مدينة في مصر إلا واتعمل فيها كبري جديد أو طريق تم تطويره بالكامل.. ده غير الطرق السريعة والطرق الصحراوية اللي شقتها الدولة.. واللي ساعدت بشكل كبير في تحقيق سيولة مرورية في كل محافظات الجمهورية. لدرجة إنك لو غبت عن مكان ورجعت له بعد كام شهر.. هتلاقي شكله اتغير تمامًا بسبب التطويرات.
طب يا ترى ليه كل الشغل ده؟
البنية التحتية الكبيرة اللي بتقوم بيها الدولة في قطاع النقل كان هدفها الأساسي الاستثمار والصناعة.
واحد ممكن يسأل ويقول.. "إيه علاقة الطرق والكباري بالاستثمار والصناعة؟
خليني أوضحلك.. أي دولة في العالم بتحاول تحقق نهضة اقتصادية أو طفرة في مجال الاستثمار والصناعة.. لازم تبدأ ببنية تحتية قوية تدعم المستثمرين والمصانع.. وده اللي عملته الدول الصناعية الكبرى. مصر حاليًا شغالة على نفس النهج.
الدولة طورت أغلب الطرق البرية وخلقت شبكة طرق تربط كل أنحاء الجمهورية ببعضها.. وده مش بس سهل حركة الناس.. لكن كمان سهل حركة البضائع والنقل التجاري. الطرق الصحراوية اللي اتعملت خلت مناطق كان الوصول ليها مستحيل قبل كده تتحول لمناطق حيوية ونقاط جذب للاستثمار.
ليه الطرق والكباري مهمة للمستثمرين؟
أي مستثمر بيقرر يفتح مصنع أو يبدأ مشروع كبير.. أول حاجة بيبص عليها هي البنية التحتية للدولة اللي هيشتغل فيها. التصنيع دايمًا مرتبط بالنقل.. والنقل محتاج طرق سريعة.. والطرق دي لازم تكون متصلة بمواني ومطارات جاهزة للتصدير.
مصر حاليًا عندها شبكة نقل وتصدير بتنافس أكبر الدول في العالم.. وده كله بفضل المشاريع اللي اشتغلت عليها الحكومة على مدار السنين اللي فاتت.
وإيه النتيجة؟
الشغل ده بدأنا دلوقتي نحصد ثماره.. مصر بقت وجهة جذابة لرؤوس الأموال الأجنبية.. كل يوم في طلبات جديدة من مستثمرين عايزين يدخلوا السوق المصري لبناء مصانع واستثمارات.
ده مش بس بسبب الطرق.. لكن كمان بسبب الحوافز الكبيرة اللي قدمتها الدولة لجذب رؤوس الأموال الأجنبية.. ومع الوقت ده هيحول مصر لمركز إقليمي للتبادل التجاري والتصنيع.. ويرفع من مكانتها الاقتصادية عالميا.
