لو أنت صاحب حرفة.. البنك ده هيديك 10 آلاف جنيه عشان تعمل مشروعك
كتير من أصحاب الحرف في مصر وخاصة الشباب بيفكروا يعملوا مشروع خاص بيهم، بيبقي عندهم الفكرة وطريقة التنفيذ، ولكن مافيش سيولة مالية تساعدهم على تنفيذ المشروع.
ومن هنا، البنك الزراعي المصري، بيقدم أكبر دعم لقطاع المشروعات الصغيرة والمتوسطة ومتناهية الصغر، وخاصة لأصحاب الحرف بشروط ميسرة.
والبنك الزراعي ببطلق برنامج (باب رزق) عشان يدعم الحرفيين، وبيمول مشروعاتهم، من خلال قروض ميسرة بتسهيلات ومميزات كتيرة.
كمان، البنك الزراعي بيقدم برنامج "باب رزق" للمرأة الريفية والمعيلة، وصغار التجار والحرفيين والباعة الجائلين، عشان يدعم مشروعاتهم الجديدة، ويبدأوا ينفذوها، وتكون مصدر رزق جديد لهم ولأسرهم.
طب إيه هي شروط قرض البنك الزراعي لأصحاب الحرف والمستندات المطلوبة؟
في البداية، البنك هيمولك بقرض بيبدأ من 2000 جنيه، لحد 10 آلاف جنيه، وبيتم السداد على أقساط، وكمان برنامج باب رزق ببحدد دوريات متنوعة للسداد؛ سواء شهرية وربع سنوية ونصف سنوية، وفقا لطبيعة التمويل والغرض من النشاط.
ونقدر نقول إن أقصى فترة سداد هي 12 شهر يعني سنة، وأقل فترة 6 شهور، ولكن من أهم مميزات قروض البنك الزراعي المُيسرة، إنه متاح بدون مصاريف، وكمان في تنوع لأنظمة السداد عشان تناسب جميع أصحاب المشروعات ضمن هذه الفئة.
برضو في سهولة الإجراءات وسرعة الحصول على القرض وصرف والتمويل، طالما مستوفي الشروط، وممكن يتم منح فترة سماح تصل لـ60 يوم قبل دفع أول قسط، وفي إمكانية الإشتراك بين 4 مقترضين للقرض نفسه.
كمان، متاح ضمان المقترضين بعضهم البعض، ومسموح بإصدار بطاقة ميزة البنك الزراعي مجانية، ولكن لازم حضرتك تحضر صورة البطاقة الشخصية، وإيصال مرافق حديث، زي إيصال المياه أو الكهرباء أو الغاز، وكمان البطاقة الشخصية للضامن، عشان تقدر تاخد القرض.
فلو أنت مستعجل على القرض، لم ورقك واطلع على أقرب فرع ليك للبنك الزراعي المصري.
