كواليس اجتماع السيسي بمحافظ المركزي والانطلاقة الجديدة في قطاع البترول
إيه اللي حصل النهاردة في اجتماع الرئيس السيسي ومحافظ البنك المركزي المصري ورئيس الحكومة وايه هي توجيهات الرئيس الجديدة وايه اللي هيحصل في قطاع البترول والغاز الفترة الجاية..
النهاردة الرئيس عبدالفتاح السيسي عمل اجتماع مهم جدا مع الدكتور مصطفى مدبولي رئيس مجلس الوزراء، والمصرفي حسن عبدالله محافظ البنك المركزي، وأحمد كجوك وزير المالية والمهندس كريم بدوي وزير البترول والثروة المعدنية والرئيس جمع المسؤولين دول عشان يستعرض موقف قطاع البترول والغاز والخطط اللي عندهم وعادة الرئيس مش بيناقش ملف معين غير لما يكون فيه قرارات جديدة للنهوض بيه وتحقيق انطلاقة كبيرة وملف البترول والغاز من أهم القطاعات الاقتصادية في مصر حالياً لأنها مورد أساسي من موارد الطاقة في مصر وهو اللي بيشغل محطات الكهرباء والمصانع وماكينات الري وغيرها يعني قطاع أساسي.
وكمان أهمية قطاع البترول والغاز إنه بيستنزف موارد دولارية كبيرة جدا لما الدولة بتلجأ للاستيراد وشفنا الحكومة استوردت غاز ب1.2 مليار دولار خلال الصيف اللي فات بس ودا غير الشحنات التانية اللي استوردتها للاحتياطي ودا في وقت مصر سجلت صادرات قياسية من الغاز في 2022 باكتر من 8 مليار دولار لكن اللي حصل بعدها من انخفاض انتاج حقل ظهر وتباطيء عمليات تنمية الحقول والاستكشاف بعد تراكم مستحقات الشركات الأجنبية خلق فجوة كبيرة بين الإنتاج والاستهلاك وعشان كده الحكومة لجأت للاستيراد في وقت كان عندها أزمة في الدولار نتيجة الأزمات العالمية.
بعد صفقة رأس الحكمة الحكومة سددت جزء كبير من مستحقات الشركات الأجنبية واللي عادت بالفعل للاستثمار في حقول البترول والغاز القديمة وفي التنقيب بالاماكن الجديدة وظهرت بشاير الخير في اكتر من موقع لكن مكنتش كفاية وعشان كده الرئيس السيسي عمل اجتماع النهاردة بقيادات الحكومة والمركزي والمالية والبترول لبحث جهود الحكومة لضمان تلبية احتياجات الدولة من المنتجات البترول اللازمة لمشاريع التنمية بخلاف توفير الاعتمادات الضرورية لاستدامة العمل بكفاءة في قطاع البترول والغاز.
الرئيس استعرض كمان جهود الحكومة لزيادة الإنتاج المحلي من الثروة البترولية والغاز وأصدر تعليمات بمواصلة تطوير الآبار الجديدة المكتشفة وإدراجها ضمن خريطة الإنتاج ودا بخلاف تكثيف أنشطة البحث والاستكشاف في المناطق البرية والبحرية في مصر ودي أهم نقطة في الاجتماع النهاردة لأن تعليمات الرئيس بتتنفذ فورا وتكثيف التنقيب معناه إن مصر ممكن تكتشف آبار ضخمة من البترول والغاز يوفر عليها مليارات الدولارات في السنة ويرجع مصر لسوق التصدير بقوة.
السيسي سأل كمان عن آخر مستجدات التعاون بين الحكومة والشركات العالمية والمستثمرين المحليين في مجال البترول والغاز وجهود جذب القطاع الخاص للتوسع في استثماراته ضمن هذا القطاع وزيادة الاستثمارات الأجنبية وعشان كده الرئيس وجه بضرورة انتظام سداد المستحقات المالية للشركات المتعاقدة مع الدولة في قطاع البترول والغاز لأن دا هيضمن استمرار ضخ استثمارات جديدة وتوسيع الشركات دي لانشطتها في مجال التنقيب والاستكشاف.
طيب ليه محافظ البنك المركزي المصري حضر الاجتماع مع الرئيس ؟
طبعا وجود محافظ البنك المركزي كان ضروري خاصة في ملف الشركات الأجنبية العاملة في مصر ولان المركزي هو المنوط بيه توفير العملة الأجنبية للشركات دي عشان تصرف مستحقاتها وكمان الرئيس السيسي أكيد استمع من محافظ البنك المركزي لآخر تطورات السياسة النقدية وموقف الدولار.
الخلاصة أن قطاع البترول والغاز بعد اجتماع الرئيس النهاردة هيشهد انطلاقة جديدة مع المتابعة الرئاسية على مدار الساعة وهنشوف نتائج الاجتماع دا قريب جدا.
