لو عايز تعمل شركة في يوم واحد.. شوف التقرير ده
كتير من الشباب بتجيلهم أفكار مطرقعة، سواء عن مشروع أو عن فرصة عمل أو حتى نشاط تجاري، فمن هنا بتبدأ رحلة البحث جوه أفكارهم.. إزاي أحقق الهدف وأعمل حاجة خاصة بيا، يكون عليها بصمتي.
من هنا، احنا هنقولك إزاي تبدأ، لو أنت بتفكر تعمل مشروع أو تقف على رجليك، فلازم حضرتك تأسس شركة، والموضوع مش صعب خالص، ده هيكلفك من وقتك يوم واحد بس.
بس لازم لما تيجي تأسس شركة، يكون معاك شريك على الأقل، وتكون الشركة دي محدودة المسؤولية، بس مطلوب شوية مستندات رسمية كده، زي شهادة عدم التباس الاسم، بتكون معتمدة من السجل التجاري، وكمان شهادة بنكية بإيداع رأس المال اللي مايقلش عن ألف جنيه مصري في أحد البنوك.
مطلوب كمان توكيل من الممثل القانوني لصاحب الشركة، ومستخرج حديث من السجل التجاري، وكمان، توكيل بتأسيس شركة الشخص الواحد ، سواء كان المؤسس شخص اعتباري أو طبيعي، ويكون التوكيل ده منصوص فيه تأسيس الشركات والتوقيع على عقود التأسيس أمام الشهر العقاري.
كمان مطلوب نماذج التعريف بالمستثمر عن صاحب الشركة أو المدير الأجنبي كمستند + صورتها على CD، وأصل مستخرج رسمي من سجل المحاسبين والمراجعين موجه لهيئة الاستثمار.
برضو مطلوب صور إثبات الشخصية لمؤسس الشركة، وتكون سارية واضحة أو جواز سفر، ومطلوب صور إثبات الشخصية للوكيل سارية واضحة، وصورة من كارنية القيد في نقابة المحامين للمحامي اللي بيقوم بالتصديق على العقد أمام نقابة المحامين.
بعد كل الإجراءات دي، لازم تحدد اسم وعنوان المستشار القانوني للشركة على ألا تقل درجة القيد عن محام استئناف، وبعد كده هتحصل على موافقة الجهة المختصة لتأسيس شركتك، بعد ما تنتهي من كل الإجراءات دي خلال يوم واحد بس.
نيجي بقى للخطوة السهلة وهي طريقة التأسيس، واللي بتبدأ من بوابة الحكومة الإلكترونية، اللي هتخش عليها وتسجل، يعني تعمل حساب ومساحة عمل خاصة بيك، بعد كده هتختار الخدمة اللي هتقدمها وتقدم المستندات المطلوبة، عشان يتم مراجعتها.
بعد كده، هتدفع الرسوم باستخدام الفيزا، وتوقع على المستندات إلكترونيًا، وشوية وهتستقبل كل المستندات الخاصة بالشركة بتاعتك الحساب الخاصة بالمستثمر على البوابة الإلكترونية.
كمان في طريقة تانية، وهي إنك تأسس الشركة من خلال مركز خدمات المستثمرين، هتخش على الموقع الإلكتروني بتاعه، بعدين تختار الخدمة والحصول على رقم الانتظار ، بعدين هيتم مراجعة المستندات وإصدار عقد تأسيس الشركة وتوقيعه إلكترونيًا، ثم سداد الرسوم.
وبكده تكون خلصت إجراءات تأسيس شركتك بنجاح.
