طاقة القدر لمصر.. إيه اللي بيحصل في حقل ظهر وامتى هيرجع لخريطة الإنتاج؟
يا ترى إيه اللي بيحصل في حقل ظهر للغاز، وليه وزارة البترول مهتمة جدا بكل تفصيلة بتحصل عن الحقل ده، وهل إنتاجيته شهدت تغيير ملحوظ خلال الفترة الأخيرة، وإزاي هيبوح بكل أسراره ونقدر نستفيد من ثرواته، خاصة وإنه بيعتبر أكبر كشف غاز بالبحر المتوسط، ومن أكبر الاكتشافات على المستوى العالم.
في الساعات الأخيرة، حقل ظهر أخد ضجة إعلامية كبيرة جدا، وده كان بسبب بيان من وزارة البترول، أكدت فيه إن شركة "إيني" الإيطالية، مستمرة في العمل والإنتاج لكميات جديدة من الغاز من حقل ظهر لحد شهر مايو 2025، بدل شهر يناير.
والوزارة نفت الكلام اللي بيتقال، بإن أعمال حقل ظهر واقفة بسبب عدم استقرار الطقس في البحر خلال فصل الشتاء، وأكدت إن الدنيا تمام.
والكلام ده معناه، إن أعمال استكشاف حقل ظهر لسه ما انتهتش، وإن الحقل مليان خيرات كتيرة لسه شركة إيني ماكتشفتهاش لحد دلوقتي، خاصة وإن سفينة الحفر بتستعد دلوقتي للوصول لمصر عشان تبدأ الحفر في شهر يناير الحالي، باستخدام التقنيات الحديثة، وده طبعا بهدف زيادة الإنتاج والعودة إلى مخططات الإنتاج المعتمدة.
ومن ناحية إيني الإيطالية، فأعلنت بشكل رسمي عن استعدادها لاستمرار الحفر في حقل غاز ظهر، وقالت إن سفينة الحفر (سايبيم 10000) بتكمل عملياتها، وهتحفر خلال أيام عشان تزود إنتاج الغاز في مصر.
وكانت (إيني) بتستعين بمعدات حفر آبار إضافية في حقل غاز ظهر في نهاية شهر ديسمبر اللي فات، عشان تقدر تعزز خطة الإنتاج، وقامت بالفعل بإدخال إنتاج جديد بيصل إلى 220 مليون قدم مكعب يومي، وده من خلال إضافة بئرين جديدين بس.
وبلغة الأرقام كده، فنقدر نتوقع إن قبل نص 2025، هيرجع حجم إنتاج حقل ظُهر زي ما كان، لأنه بيعتبر من أهم مشروعات تنمية حقول الغاز الطبيعي، وكمان الشركات العاملة في مجال النفط والغاز، صنفته بأنه أكبر كشف غاز بالبحر المتوسط، ومن أكبر الاكتشافات على المستوى العالم.
كمان، حقل ظهر موجود في منطقة كبيرة في البحر المتوسط اسمها "شروق"، وهي منطقة بتبعد حوالي 200 كيلومتر شمال بورسعيد، وهو أكبر حقل غاز في مصر تم اكتشافه في البحر الأبيض المتوسط في سنة 2015، عشان كده متوقع إنه يرجع لسابق عهده خلال أيام، وده لأنه من أهم مصادر الطاقة لمصر، وعودته للإنتاج بيعكس الجهود المستمرة لتعزيز قطاع الطاقة، وتحقيق الاكتفاء الذاتي لمصر من الغاز، واللي بالتالي هينهي أزمات كتيرة بنمر بيها، وكمان هيعزز صادراتنا من الغاز وبالتالي هيدعم الموازنة العامة للدولة.
غير كده، ظهر كان حقق رقم قياسي في سنة 2022، لأن وصل حجم إنتاجه 2.7 مليار قدم مكعب غاز طبيعي يوميًا، وكمان وصلت إجمالي الاستثمارات فيه 741 مليون دولار، عشان يحقق من بداية عمله 12 مليار دولار.
ونقدر نقول، إن الحقل ده منجم وطاقة قدر كبيرة لمصر، عشان فيه 15 بير غاز، وكمان بينتح 40 بالمئة من إجمالي إنتاج مصر الكلي من الغاز، حتى احتياطياته بتقدر بحوالي 30 تريليون قدم مكعب غاز، يعني أكثر من 135% من الاحتياطي الحالي للزيت الخام في مصر.
ومش بس كده، لأ ده كمان في فرص كتيرة كويسة فى مناطق البحث والاستكشاف بمحيط حقل ظهر، عشان نزود معدلات الاحتياطيات البترولية والغازية وزيادة الإنتاج، ونقدر نحقق كل الفرص المتاحة ونحفر المزيد من الآبار عشان نزود الإنتاج، وبالتالي تحصل انتعاشة قوية للاقتصاد المصري بسبب "ظهر".
