هو المونوريل هيشتغل إمتى؟ وهيشتغل فين؟.. هنقولك كل حاجة عن المشروع الكبير
يا ترى المونوريل وصل فين، وامته هتنتهي زحمة الشوارع ويشتغل بشكل رسمي، وإيه هي المناطق اللي هيشتغل فيها وامته بالظبط.
في الفترة الأخيرة، وزارة النقل قالت إنها شغالة من نار في مشروع المونوريل، واللي هو قطر كهربائي بيشتغل بالكهرباء، وبتنفذ منه خطين، الأول هيربط القاهرة بالعاصمة الإدارية الجديدة، والتاني هيربط المهندسين بمدينة 6 أكتوبر.
ونقدر نقول إن المونوريل بيتنفذ في مصر لأول مرة في التاريخ، وبيعتبر وسيلة مواصلات جماعية وسريعة وعصرية وآمنة، كمان بيوفر في استهلاك الوقود وبيخفض معدلات التلوث البيئي وهيخفف الإختناقات المرورية في المحاور والشوارع، غير كده هيقدر يجذب الركاب عشان يستخدموه بدل عربياتهم الخاصة.
ومن شوية أيام، وزارة النقل نجحت في تنفيذ التشغيل التجريبي لمونوريل شرق النيل، أو مونوريل العاصمة الإدارية، بدون ركاب، وده كان في المسافة من مركز السيطرة والتحكم بالعاصمة الإدارية لحد محطة المشير طنطاوي في التجمع الخامس.
والخط ده بيمتد من محطة الإستاد بمدينة نصر، وبيمر بمركز السيطرة والتحكم لمشروع المونوريل بالعاصمة الإدارية الجديدة، بطول 56.5 كم، وبيشتمل على 22 محطة، ويتم تنفيذه من خلال تحالف شركات (ألستوم – أوراسكوم – المقاولون العرب).
كمان، مونوريل شرق القاهرة بيساهم في ربط إقليم القاهرة الكبرى بالمناطق والمدن العمرانية الجديدة شرقًا، زي (القاهرة الجديدة - العاصمة الإدارية)، وكمان بيساهم في تسهيل حركة نقل الموظفين والوافدين من القاهرة والجيزة إلى القاهرة الجديدة والعاصمة الإدارية.
المفاجأة بقى إنه بيتكامل مع الخط الثالث للمترو، أو بيرتبط به في محطة الاستاد بمدينة نصر، وكمان مع القطار الكهربائي الخفيف LRT بمحطة الفنون والثقافة بالعاصمة الإدارية الجديدة.
نيجي بقى لمونوريل غرب النيل، أو خط 6 أكتوبر، واللي هو بيمتد من منطقة المهندسين بالقاهرة لحد قلب 6 أكتوبر، بإجمالي 42 كم.
وكمان بيضم 12 محطة، وهى (جامعة الدول العربية- الطريق الدائري- المريوطية- المنصورية- الطريق الصحراوي (القاهرة- الإسكندرية- هايبر وان- - جهينة- هيئة المجتمعات العمرانية- الحصري- دار الفؤاد- المنطقة الصناعية- القطار السريع).
وقطار المونوريل نفسه ببتكون من 4 عربات، ومن المخطط زيادة عدد العربات إلى 8 عشان يستوعب زيادة الكثافة السكانية بالمناطق العمرانية الجديدة اللي بيخدمها.
أما موعد تشغيل المونوريل، فحسب هيئة الأنفاق، فمخطط إنه يستغل بشكل رسمي في شهر أبريل من الجاي.
