منتجات مصر هتوصل لكل حته في العالم.. شوف البنوك بتعمل إيه لدعم الصادرات
فكرت قبل كده إزاي المنتجات المصرية بتوصل لكل حتة في العالم؟ وإيه دور البنوك في فتح الأبواب للشركات المصرية إنها تنافس عالميًا؟ وهل دعم البنوك للشركات المصدرة ممكن يكون المفتاح لنمو الاقتصاد المصري بشكل كبير؟
الصادرات في اى بلد في العالم هي كلمة السر لأي اقتصاد ناجح. .وكل ما بلدك تصدر أكتر كل ما اقتصادها يقوى ويكون عندها فرص أكتر لتوفير العملة الصعبة وزيادة معدلات النمو.
والسؤال المهم هنا إزاي الشركات المصدرة بتقدر تكبر؟ وإيه دور البنوك في إنها تديهم الدعم اللي يخليهم ينافسوا في السوق العالمي؟
الحقيقة إن البنوك المصرية في الفترة الأخير، لعبت دور كبير جدا في دعم الصادرات.. مش بس بتمويل المشروعات .. لكن كمان بتقديم تسهيلات وخدمات خاصة للشركات المصدرة.
وعشان شركة تصدر منتجاتها للخارج بتحتاج تمويل كبير سواء عشان تجيب مواد خام أو توسع خطوط الإنتاج أو حتى تغطي تكاليف الشحن والتوزيع.. وهنا بيجي دور البنوك اللي بتقدم برامج تمويلية مخصصة للشركات المصدرة.. ومنها قروض بفوايد ميسرة.. تسهيلات في الدفع.. وكمان تمويل عقود التصدير يعني لو شركة عندها عقد مع عميل برا مصر البنك بيمول العملية لحد ما العميل يدفع.
ده غير التسهيلات البنكية الدولية لأن واحدة من أهم التحديات اللي بتواجه الشركات المصدرة هي التعامل مع بنوك في دول تانية.. وهنا البنوك المصرية بتلعب دور الوسيط عن طريق ضمان الصفقات الدولية وتقديم خطابات الاعتماد اللي بتأمن حقوق الشركات المصرية.
ومع كل ده فيه كمان دعم المشروعات الصغيرة والمتوسطة.. الشركات الكبيرة مش لوحدها اللي بتصدر.. فيه آلاف الشركات الصغيرة اللي عندها منتجات مميزة ومطلوبة عالميًا.. والبنوك بتوفر برامج مخصصة لدعم المشروعات دي زي تمويلات مبادرات البنك المركزي لدعم المشروعات الصغيرة اللي بفايدة بسيطة وده بيخلي الشركات دي تدخل السوق التصديري بثقة.
وخلينا نقولك البنوك اللى بتقدم الدعم ده .. البنك الأهلي المصري قدم تمويلات كبيرة للشركات المصدرة في قطاعات زي الملابس الجاهزة والمنتجات الزراعية.. كمان وفر خدمات ضمان الصفقات اللي بتخلي الشركات تقدر تتعامل بسهولة مع عملاء من أوروبا وآسيا.. بنك مصر كمان عنده مبادرات لدعم الصناعات الصغيرة المصدرة خصوصا في قطاع الصناعات الحرفية زي السجاد اليدوي والمنتجات التراثية.
طب ليه كل ده مهم؟
لما الشركات المصرية تصدر أكتر.. ده بيجيب عملة صعبة ودي حاجة أساسية لاستقرار الاقتصاد.. كمان بيزود فرص العمل لأن الشركات اللي بتصدر بتحتاج عمالة أكبر.. وأخيرا ده بيحسن صورة مصر في الأسواق العالمية وبيفتح أبواب لشركات تانية تدخل السوق الدولي.
والدولة حاليا عندها خطط طموحة إنها تضاعف قيمة الصادرات في السنين الجاية.. والبنوك هتكون جزء أساسي من الخطة دي.. من خلال تمويل المشروعات التصديرية وتقديم حلول مبتكرة للشركات.
