سنة الأرباح.. ليه لازم تستثمر في الدهب في 2025
ليه 2025 هتكون سنة الدهب وليه المعدن الأصفر هيفضل الاستثمار المريح في الشهور الجاية.. وياترى أسعار الدهب رايحة على فين في الصاغة المصرية.
الدهب كان هو بطل المشهد في 2024 عالميا ومحليا وعزز مكانته كملاذ آمن واستثمار استراتيجي مع الأوضاع الاقتصادية والجيوسياسية المتقلبة في 2024 وعشان كده حقق الدهب أداءً استثنائي وسجل مستويات قياسية غير مسبوقة محققاش من 10 سنين والتوقعات كلها رايحة في سكة إن الدهب مكمل رحلة الصعود في 2025 وهيوصل لمحطة ال3000 دولار قبل ما يبدأ يستقر ويتراجع ببطء في 2026 ودي توقعات من مؤسسات مالية عالمية معتمدة على بيانات دقيقة لعوامل كتير جدا يعني مش بيقولوا اي كلام وخلاص.
ومثلا الخبراء الاستراتيجيين في شركة إم كيه إس بامب إس إيه، الأمريكية شايفين أن الدهب هيواصل الصعود في 2025 وفي نفس الوقت المحللين في بنك جيه بي مورجان قالوا انه متوسط سعر المعدن الاصفر في أمريكا الشمالية هيوصل 2950 دولار مع إمكانية وصوله إلى 3 آلاف دولار أمريكي للأوقية الواحدة أما بنك جولدمان ساكس فأكد في مذكرة بحثية إن سوق الدهب العالمي هيشهد زيادات مضطردة في 2025.
طيب السوق المحلي الدهب رايح على فين خلال 2025؟
مصر جزء من العالم وبتستورد كميات كبيرة من الدهب عشان تحوله لمشغولات أو بتستودره كامل التصنيع وطبعا الدهب زي اي سلعة بتيجي من بره يعني الدفع هيكون بالدولار ولما سعر الدهب هيزيد عالميا سعره في السوق المصري هيقفز مقارنة بقيمة الجنيه يعني عيار 21 مثلا ممكن يوصل ل4 آلاف جنيه واكتر وعيار 45 ممكن يوصل اكتر من 5 آلاف جنيه وهيزيد كل ما السعر العالمي يرفع وكمان في حالة زيادة الطلب المحلي على الدهب لأن المصريين عندهم هوس لشراء وتخزين المعدن المنقذ مع انخفاض قيمة الجنيه والرغبة ف بالاحتفاظ بقيمة الفلوس أو للاستثمار وتحقيق مكاسب كبيرة نظرا لفرق السعر .
وخبراء الصاغة بينصحوا اي حد بيفكر يستثمر في الدهب أنه يستغلوا استقرار الأسعار دلوقتي ويشتروا دهب خاصة أن البنوك لسه مطرحتش شهادات ادخال بفايدة عالية مع اتجاه المركزي لخفض سعر الفايدة في الاجتماعات الجاية حسب توقعات الخبراء ودا معناه أن فيه مليارات الجنيهات اللي كانت مدفوعة في شهادات الادخار ممكن تروح على سوق الدهب وهنا هتحصل قفزة جديدة مع زيادة الطلب مع توفر السيولة الكبير نتيجة انقضاء أجل شهادات الادخار ذات العائد 22.5% و27% واللي هتخلص في 5 يناير الحالي وأصحاب الشهادات هياخدو فلوسهم ولو استثمروها في الدهب هيكون فيه اقبال كبير.
يعني الخلاصة لو معاك سيولة زيادة الافضل انك تحطها في الدهب لانه استثمار طويل الأجل ومكسبه مضمون ومفيش حد خسر فلوسه في الدهب لأنه معدن نادر وسعره في ارتفاع دايما والافضل ليك تشتري جنيهات دهب أو سبايك لأنها مربحة اكتر ساعة البيع.
