لو قلقان علي صرف السلع التموينية لشهر يناير.. شوف التقرير ده
ناس كتير عندها قلق حاليا بسبب صرف المقررات التموينية لشهر يناير اللي جاي خصوصا بعد الكلام الكتير اللي انتشر في الفترة اللي فاتت عن تحويل الدعم التمويني لدعم نقدي.. فهل يا تري هيبقي في تموين الشهر اللي جاي ولا لا.. والدنيا هتمشي ازاي الفترة اللي جاية.
في كلام كتير انتشر الفترة اللي فاتت، عن بدء استعدادات الدولة ممثلة في وزارة التموين والتجارة الداخلية للتحول من الدعم التمويني الي دعم نقدي، والكلام دي هيكون بداية تطبيقة من شهر يناير اللي جاي، ومن يوم الاخبار دي والناس بقي عندها قلق بسبب صرف المقررات التموينية لشهر يناير، وهل الدولة هتصرف تموين للناس زي زمان، ولا الدنيا هتقف ولا الأمور هتمشي ازاي.
ومن كام ساعة بس وزارة التموين والتجارة الداخلية طلعت وطمنت الناس علي صرف المقررات التموينية لشهر يناير اللي جاي، وقالت أن مستمرة في صرف السلع التموينية بدون اي تعديل خلال شهر يناير، وهتبدا الدولة في صرف السلع التموينية مع بداية شهر يناير 2025 من خلال 40 ألف منفذ على مستوى الجمهورية لصالح 64 مليون مواطن.
وزارة التموين والتجارة الداخلية قالت أنها وفرت 30 صنف من السلع مدعومة بقيمة تصل لأكثر من 3 مليار جنيه شهريا بأجمالي قيمة بتوصل لـ 37 مليار جنيه سنويا، وهيوصل سعر السكر وزن كيلو جرام لـ 12.60 جنيه، وزيت الخليط 800 مللي هيكون سعره 30 جنيه، والمكرونة 800 جم هيكون سعرها 17 جنيه، والمكرونة 400 جم هيكون سعرها 8.5 جنيه، والعدس المجروش 500 جم هيكون سعره 21 جنيه، والفول 500 جم هيكون سعره 9 جنيه، والدقيق وزن 1 كجم هيكون سعره 18 جنيه، والمسلي الصناعي 800 جم هيكون سعره 36 جنيه، والشاي الناعم 40 جم هيكون سعره 5 جنيه، والصلصة 300 جم هيكون سعرها 8 جنيه.
وزارة التموين والتجارة الداخلية قالت كمان أنها وفرت احتياطي استراتيجي آمن ومستدام من السلع الأساسية والاستراتيجية لمدة مش بتقل عن 6 شهور من خلال التعاقدات اللي بتقوم بيها الهيئة العامة للسلع التموينية والشركة القابضة للصناعات الغذائية بما يضمن توفير وإتاحة السلع والخدمات لمستحقي الدعم للفئات الأولى بالرعاية، وتحقيق الأمن الغذائي، واستمرار تدفق الإمدادات للمقررات التموينية من الخبز المدعم والسلع الأساسية.
