نازلة زي الرز.. مكاسب ارتفاع تحويلات المصريين في الخارج للاقتصاد المصري
يا ترى إيه سر ارتفاع تحويلات المصريين الموجودين خارج مصر، وليه سجلت معدلات مرتفعة خلال الفترة الأخيرة بنسبة 45.3% في 10 شهور بس، وكل ده هيعود على الاقتصاد المصري بايه.. هنقولك كل التفاصيل في الفيديو ده فتابعنا للآخر.
في العشر شهور الأخيرة من سنة 2024، تحويلات المصريين العاملين بالخارج، حققت قفزات متتالية، وارتفعت بمعدل 45.3%، عشان توصل ل 23.7 مليار دولار مقابل نحو 16.3 مليار دولار خلال نفس الفترة من السنة اللي فاتت.
ونقدر نقول إن السبب في زيادة تحويلات المصريين، هو نجاح السياسات النقدية اللي بيتبعها البنك المركزي من وقت ما أصدر قرار وضع سعر صرف عادل تحديدا في شهر مارس اللي فات، واللي ساهمت في القضاء على السوق السودا أو السوق الموازي للعملة، وبالتالي استقر سعر الصرف على مدى العشرة أشهر اللي فاتت، وكل ده أدى لعودة وزيادة ثقة العاملين بالخارج، وعمل تحويلات بالدولار واليورو لمصر.
وبلغة الأرقام، ارتفعت تحويلات العاملين في الخارج في شهر أكتوبر بنحو 2.9 مليار دولار مقابل 1.7 مليار دولار خلال نفس الشهر في 2023، وسجلت نسبة زيادة 68.4%، ودي تعتبر الزيادة ال 8 للشهر ال 8 على التوالي في التحويلات دي.
وعشان سعر النقد الأجنبي استقر خلال الشهور الماضية من وقت ما تم سعر صرف عادل في مارس، فالسوق السوداء للعملة تقريبا انتهت بشكل نهائي، وكل ده ساهم في زيادة الثقة في الاقتصاد المصري.
ضيف على كل ده، إن السياسات النقدية للبنك المركزي المصري، ساهم في زيادة معدلات التنازل عن الدولار للمصارف الرسمية، وكل ده عزز من قدرة البنوك على تلبية قوائم الانتظار الخاصة بالعملة الأجنبية، نتيجة توافر النقد الأجنبي بالبنوك بكميات كافية للمستوردين.
كمان، من أسباب زيادة تحويلات المصريين بالخارج، هو الاستفادة من سعر الفائدة المرتفع في البنوك، بالإضافة لمبادرة طرح أراضي وعقارات بالعملة الأجنبية للمصريين بالخارج، فكل دي كانت محفزات قوية لعودة التحويلات من تاني.
وطبعا من أهم مكاسب التحويلات دي، فهي تعتب، تاني أهم مصدر من مصادر دخل مصر من النقد الأجنبي، ومتوقع أنها توصل خلال نهاية السنة دي اأكثر من 30 مليار دولار.
وبالمختصر كده، فتحويلات المصريين في الخارج بتساهم في زيادة الاحتياطي النقدي بالبنك المركزي والاستقرار الاقتصادي وتعويض العجز التجاري للبلاد، عشان كده ارتفع الاحتياطي النقدي الأجنبي ووصل لحوالي الـ47 مليار دولار، إضافة لأن زيادة تحويلات المصريين هيساهم في استقرار سعر صرف العملة الأجنبية مقابل الجنيه نتيجة زيادة حجم المعروض من النقد الأجنبي.
كمان، التحويلات المالية من العملة الصعبة للبنوك، زادت خلال الأشهر الماضية سواء من المصريين العاملين بالخارج أو المؤسسات المالية والمستثمرين الأجانب الراغبة في الاستثمار، سواء في سندات وأذون الخزانة، وكل ده زاد من الاحتياطي النقدي واستقرار سعر الصرف.
وآخر حاجة كانت خطوة حلوة جدا، وهي تسهيل التحويلات المالية للمصريين بالخارج، من خلال تطبيق إنستا باي في بعض الدول المحيطة، فالخطوة دي هتسهل عملية التحويلات المالية لهم، وكمان قرار البنك المركزي بإصدار التراخيص لعدد من البنوك المصرية لتفعيل خدمة استقبال الحوالات المالية من الخارج وإضافتها فورا إلى حسابات العملاء عبر انستاباي، شجع المصريين جدا على تحويل فلوسهم لمصر وبالتالي تحقيق مكاسب للطرفين.
ولكن في النهاية، فالتحويلات دي بتعكس ثقة المصريين في السياسات الاقتصادية المستقرة لبلده، وكل ده هيساهم في دعم الاقتصاد الوطني وتعزيز الاستدامة المالية.
