ماذا يحدث في إقتصادية قناة السويس وما هي حكاية الـ64 مليار دولار
هو ايه اللي بيحصل في المنطقة الاقتصادية لقناة السويس وأي حكاية الاستثمارات الضخمة اللي دخلت المنطقة وايه كمان حكاية ال64 مليار دولار اللي شغالة وهتشتغل في المشروع وليه المنطقة هتقلب موازين الاقتصاد المصري.
مصر اخترعت في عهد السيسي فكرة المناطق الصناعية المتخصصة واختارت ليها اماكن جغرافية سحرية عشان تسوق إنتاجها ولأن كل موقع مصر الجغرافي مميز جدا فكل المناطق الاقتصادية نجحت نجاح كبير جدا وجذب استثمارات بمليارات الدولارات بسبب قربها من كل الأسواق الدولية وعشان بتطل على خطوط الملاحة البحرية وقناة السويس والموانئ العملاقة.
المنطقة الاقتصادية لقناه السويس واحدة من المناطق اللي نجحت نجاح غير مسبوق وجسدت نجاح الفكرة ودا من حجم الاستثمارات اللي استقبلتها.. وخليكم معانا ومع الأرقام وهنشرح لحضراتكم التفاصيل.
وليد جمال الدين، رئيس الهيئة العامة للمنطقة الاقتصادية لقناة السويس كان في لقاء من كام ساعة مع رئيس الوزراء الدكتور مصطفى مدبولي وقال ان الهيئة وقعت 30 مذكرة تفاهم، تم تفعيل 14 مذكرة من بينها، ومن بين الـ14 مذكرة، تم توقيع 12 اتفاقية إطارية، يُقدر حجم الإنتاج السنوي المُتوقع من مشروعاتها بـ18 مليون طن سنويا باستثمارات تقدر بـ 64 مليار دولار، وكمان جاري العمل على توقيع اتفاقية إطارية تانية لإحدى المشروعات بطاقة إنتاجية متوقع تبلغ 1.3 مليون طن سنويا واستثمارات 7.5 مليار دولار... حضرتك متخيل حجم الأرقام قد ايه وازاي 64 مليار دولار ممكن تقلب موازين الاقتصاد المصري وحجم المشروعات اللي بتتعمل وحجم العمالة المباشرة وغير المباشرة والقيمة المضافة للدولة منها.
طبعا السبب الرئيسي اللي خلي المنطقة لقناه السويس رقم واحد في استقبال الاستثمار الأجنبي هو موقعها المتميز بالقرب من ممر قناة السويس الملاحي العالمي واللي اداها ميزة نسبية كبيرة للمشروعات القائمة بالمنطقة، خاصة أن المنطقة بتوفر العديد من الحوافز والمزايا للاستثمارات القائمة.
ونرجع لكلام وليد جمال واللي قال إن المنطقة الاقتصادية لقناة السويس تقع على مساحة 455 كم2 وبتساهم في توفير 100 ألف فرصة عمل مباشرة وغير مباشرة.... ومش كده وبس دا كمان المنطقة بتعتبر مقصد واعد للمستثمرين لأن فيها 6 موانئ رئيسية وفيها 5 مشغلين رئيسيين للموانئ، ويمر بالمنطقة أهم ممر ملاحي حول العالم وهو قناة السويس بموقعها الفريد والمتميز لحركة التجارة العالمية وبيمر فيه 12% من التجارة العالمية ويمر بيها كمان 10% من البضائع المنقولة عبر البحر، ويمر بها 26 ألف سفينة سنويا.
وعلى فكرة المنطقة الاقتصادية لقناة السويس مش منطقة واحدة دي 4 مناطق صناعية في بعض وشغال فيها دلوقتي 14 مُطور صناعي و400 منشأة عاملة و استعرض رئيس الهيئة الفرص الاستثمارية المتاحة في قطاع الهيدروجين الأخضر بالمنطقة الاقتصادية لقناة السويس والبنية التحتية الخاصة به والصناعات المغذية الخاصة بخلاف استثمارات تزويد السفن بالوقود دا غير إن المنطقة بتوفر فرص هايلة في مجال توطين مكونات المحللات الكهربائية اللي بتستخدم في إنتاج الهيدروجين الأخضر، وفي تصنيع توربينات الرياح والألواح الشمسية وعشان كده بتعتبر المنطقة مثالية للصناعة في قطاع السيارات والبطاريات الكهربائية والإطارات ودا غير عن فرص كبيرة في مجال تصنيع الأدوية ومواد البناء والمنسوجات وغيرها من الصناعات المهمة.
