لو شاري موبايلك من بره مصر.. مفاجأة
يا ترى ايه آخر تطورات أزمة الموبايلات المستوردة من الخارج ؟ وهل فعلا هيتم وقف عمل بعض الأجهز؟ وليه اصلا الحكومة مهتمة أوي كده بالموبايلات اللى جاية من بره؟
السوق المصري بقا مليان بالهواتف المستوردة بشكل غير قانوني تحت مسمى "ضمان دولي".. وده بيسبب مشاكل كبيرة للمستهلكين لكن هل ده هيفضل كده.. لا طبعاً الحكومة مش ساكتة.. الجهاز القومي لتنظيم الاتصالات في مصر بدأ خطوات عملية علشان ينظم السوق ويوقف تسرب الهواتف دي.
طب ده معناه ايه للمستهلكين وللتجار؟
في تقرير جديد تم نشره مؤخرا مصادر موثوقة كشفت إن الجهاز بدأ يطالب الشركات ووكلاء بيع الهواتف المحمولة يتجهزوا بقوائم كاملة عن الأجهزة اللي بيبيعوها في السوق المصري.. يعني مش هتقدر تبيع أي جهاز في السوق المصري إلا لو هو مدرج في "القائمة البيضاء"
حد هيسأل ايه هي "القائمة البيضاء" دي؟
ببساطة دي قائمة بالأجهزة المحمولة اللي تم بيعها بشكل قانوني داخل مصر..و الشركات والموزعين هيتطلب منهم يقدموا "السيريال نمبر" لكل جهاز تم بيعه في آخر 4 سنين
عارفين يعني إيه؟
يعني كل جهاز موبايل هيتباع هيتسجل بشكل رسمي.. والهدف من الخطوة دي هو إيقاف انتشار الهواتف المستوردة بشكل غير شرعي اللي بيتم بيعها بأسعار مغرية لكن مع ضمان غير موجود والمستهلكين بيكتشفوا بعدين إنهم في ورطة كبيرة.. ومن هنا ييجي دور الحكومة في الحد من الممارسات دي خصوصا وإنها كانت فرضت قيود على استيراد أجهزة المحمول في السنوات الأخيرة علشان تحد من الضغط على الدولار.. طبعا ده دفع بعض التجار لاتباع طرق غير قانونية لاستيراد الهواتف.. وده بيخلي السوق يعاني من تشويش والمستهلكين مش عارفين إذا كانوا بيشتروا جهاز أصلي أو جهاز دخل مصر بطرق غير شرعية
طب الخطوة دي جاية ليه؟
لأن الحكومة مش بس مهتمة بإيقاف تهريب الهواتف لكن كمان شغالة على تشجيع التصنيع المحلي ونجحت في تعاقدات مع شركات كبيرة زي "سامسونج" و"شاومي" و"فيفو" علشان تصنع موبايلات هنا في مصر.. ده مش بس هيساعد في توفير أسواق للمستهلكين بأسعار أقل لكن كمان هيدعم الاقتصاد المحلي
وإيه المتوقع في المستقبل؟
الهدف الواضح من تحرك "تنظيم الاتصالات" هو ضمان استقرار السوق المصري للهواتف الذكية وحماية المستهلك من المخاطر وفي نفس الوقت تشجيع التصنيع المحلي والتوسع في الإنتاج المحلي لعدد أكبر من الشركات ومن المتوقع إن الشركات اللي بتصنع في مصر هتزيد قريب زي "أوبو" اللي بتجهز لإنشاء مصنع لها باستثمارات ضخمة
لكن في المقابل إزاي ده هيأثر على أسعار الموبايلات في السوق؟
لو الشركات المصنعة قدرت ترفع من الإنتاج المحلي، ممكن نبدأ نشوف انخفاض في الأسعار بسبب تنافس الشركات على السوق ووفي نفس الوقت لو استمرت الخطوات التنظيمية دي هيحسنوا من الوضع بالنسبة للضمانات وجودة المنتجات
في النهاية خلي بالك وانت بتشتري موبايل دايماً تأكد من إنه مش بس جهاز جديد لكن كمان جهاز قانوني في السوق
