إيه اللي بيحصل في حديد عز؟ .. وليه الشركة طلبت شطبها من البورصة المصرية
في مفاجأة كبيرة لسوق المال شركة حديد عز العملاق في صناعة الحديد قررت تشطب نفسها من البورصة المصرية.. لكن المفاجأة الأكبر هي إنها رجعت تاني للتداول في البورصة.. إزاي حصل كده؟ وليه تم شطب الشركة أصلاً؟ وده يعني إيه للسوق وللمستثمرين؟ .. تابع الفيديو ده للآخر وهنقولك ايه اللى بيحصل فى حديد عز
النهاردة الصبح الأوساط المالية كلها اتفاجئت بقرار من مجلس إدارة شركة حديد عز في بداية ديسمبر 2024 قرروا فيه تنفيذ إجراءات الشطب الاختياري من جداول القيد في البورصة المصرية.. يعني باختصار كانوا هيمسحوا اسم الشركة من البورصة بشكل اختياري ويشتروا أسهم الناس اللي مش عايزين يكملوا مع الشركة في البورصة
لكن الموضوع مش بسيط كده لأن ده مش أول مرة يحصل.. الشطب الاختياري ده بيتم في حالات معينة زي لما تكون الشركة عايزة تقلل من التزاماتها في البورصة أو لو كان عندها رغبة في تغيير هيكلها الإداري في حالة حديد عز كان القرار دا جزء من خطة شاملة لتعديل وضع الشركة في السوق
إيه كانت تفاصيل الشطب والشراء؟
في بيان رسمي أعلنت الشركة إن أسعار الأسهم اللي هتشتريها من المساهمين غير الراغبين في الاستمرار بالشركة هتكون أعلى سعر إغلاق للسهم خلال الشهر السابق على قرار الشطب واللي وصل إلى حوالي 118.98 جنيه للسهم وده معناه إن الشركة كانت مستعدة تدفع أسعار عالية للمساهمين اللي مش عايزين يكملوا
طب إيه السبب في الشطب؟
في معظم الحالات الشطب الاختياري بيحصل علشان الشركة عايزة تتحرك بشكل أسرع أو تتحكم في وضعها المالي والإداري بشكل أفضل.. و في حالة حديد عز كانت عملية الشطب جزء من محاولتها لتخفيض تكاليف وإعادة تنظيم نفسها بشكل يتيح لها المرونة في السوق.. و ومع ده كان في عملية شراء للأسهم الموجودة في بورصة لندن اللي هي أسهم شهادات الإيداع
طب إيه الجديد بقى؟ وليه رجعوا للتداول تاني؟
المفاجأة حصلت لما قررت البورصة المصرية إنها ترجع أسهم حديد عز للتداول من تاني في 8 ديسمبر بعد ما كان تم اتخاذ قرار الشطب وقررت البورصة إنها تسمح لشركة حديد عز إنها ترجع للأسواق بعد ما الشركة اتخذت إجراءاتها ووافقت على إعادة الشراء للمساهمين.. والبورصة رجعت لتداول أسهم الشركة بناءً على قرار مجلس الإدارة اللي تم اتخاذه في جلسة 7 ديسمبر 2024 بعد ما الشركة أكدت إنها هتلتزم بشراء الأسهم بأسعار مناسبة للمساهمين
وإيه تأثير ده على السوق والمستثمرين؟
بعض الخبراء بيقولوا إن إعادة تداول أسهم حديد عز بعد الشطب كانت خطوة مهمة لتنشيط السوق.. زي ما أنتوا عارفين البورصة المصرية بتعاني من قلة السيولة بعض الأحيان وإرجاع أسهم شركة كبيرة زي حديد عز ممكن يكون ليه تأثير إيجابي على حركة الأسهم بشكل عام
أما بالنسبة للمستثمرين القرار ده ممكن يكون فرصة كبيرة لشراء أسهم بسعر مناسب لو كان في عرض لشراء الأسهم من الشركة أو كانت عندهم أسهم بالفعل كمان لو الشركة مستمرة في إعادة هيكلتها المالية ده ممكن يكون مؤشر على تحسين وضعها في السوق
