كسر حاجز الـ 50 جنيه.. ليه مش لازم نخاف من ارتفاع سعر الدولار؟
الدولار عدى الـ50 جنيه.. وطبيعي تقلق وتقول ده معناه إيه؟ هل الأسعار هتغلى؟ طيب الجنيه لسه ليه فرصة يعوض؟ وايه معنى كلام الحكومة عن المرونة في سعر الصرف؟ .. طب لو قولتلك ان ده طبيعي جدًا ومش حاجة تخوف ولا تقلق؟ طب خد التقيلة حتى لو الدولار سعره زاد شوية عن كده برضوا طبيعي ومفيش ما يدعو ابدا للخوف.. لو عاوز تعرف بنقول كده ليه تابع التقرير ده للآخر وهتعرف كل التافصيل
بص يا سيدي لما بنسمع إن الدولار كسر حاجز الـ50 جنيه لأول مرة رد الفعل الطبيعي إن القلق بيزيد.. لكن قبل ما نخاف لازم نفهم إن ده جزء من سياسة اقتصادية اسمها "مرونة سعر الصرف".. السياسة دي بتقول إن سعر الدولار - أو أي عملة تانية - بيتحدد حسب العرض والطلب في السوق مش عن طريق تثبيت السعر من البنك المركزي.. يعنى كل عملة اللى بيحدد سعرها مدة الطلب عليها وكمية المعروض منها
وده مش مجرد كلام إنشائي ده تطبيق فعلي لسياسة مصر مع صندوق النقد الدولي واللي الهدف منها إننا نوصل لسعر صرف واقعي يعبر عن قيمة العملة قدام الدولار. ببساطة لما العرض والطلب يتحركوا السعر بيتحرك معاهم سواء بالزيادة أو النقصان
ولو رجعت شوية لورا .. رئيس الوزراء قالها من يومين وده مهم جدًا نفهمه: "الحركة في سعر الدولار هتبقى في إطار 4 لـ5% سواء زيادة أو تراجع"..
يعني إيه الكلام ده؟
يعني ما تقلقش لو الدولار طلع شوية النهارده لأنه ممكن ينزل تاني بنفس النسبة قريب وده طبيعي جدًا في نظام سعر صرف مرن لأن الأسعار بتتغير حسب ظروف السوق مش حاجة ثابتة.. كمان الحكومة والبنك المركزي أكدوا إن الدولار متوفر في البنوك لكل اللي محتاجه سواء شركات أو أفراد.. وده دليل إن التحرك في السعر مش بسبب نقص الدولار بل بسبب إعادة التوازن بين العرض والطلب
ولازم تفهم ان التحرك في سعر الدولار جزء من لعبة الاقتصاد الكبيرة ولو رجعنا شوية بالذاكرة هنلاقي إننا شوفنا نفس السيناريو ده قبل كده.. لما حصل تعويم الجنيه في 2016 السعر كان بيتغير بشكل كبير في الأول لكن بعد كده السوق استقر.. ونفس الشيء متوقع يحصل دلوقتي.. كمان لو بصينا على الدول اللي طبقت نفس النظام ده قبل كده زي تركيا أو البرازيل هنلاقي إن التحركات دي طبيعية جدًا في الأول لكنها مع الوقت بتوصل لتوازن لأن السوق بيتعود على النظام الجديد
أهم حاجة لازم نطمن عليها هي توافر الدولار في السوق..و البنك المركزي والبنوك المصرية أكدوا إن الدولار موجود ومفيش أي أزمة في تدبير العملة الصعبة سواء للاستيراد أو الاحتياجات الشخصية.. وفيه نقطة تانية مهمة لما السوق يلاقي الدولار متوفر ده بيخفف الضغط على السوق السوداء وبيخلي الناس تلجأ للبنوك بدل الطرق غير الرسمية.. وده بيحافظ على الاستقرار في السوق على المدى الطويل.
طيب، هل ده معناه إن الأسعار مش هتتأثر؟
الحقيقة ممكن يبقى فيه تأثير بسيط على الأسعار في الأول لكن الحركة دي بتحصل علشان توازن السوق على المدى الطويل واستقرار سعر الصرف هيخلي المستثمرين يثقوا أكتر في الاقتصاد المصري وده هيجيب استثمارات جديدة ويوفر عملة صعبة أكتر وبالتالي الأسعار نفسها ممكن تستقر بعد فترة
