مفاجآت صادمة عن أسعار الدهب.. تحرك أوروبي مفاجئ يقلب الموازين
يا ترى ليه دول زي بولندا والتشيك والمجر بقت فجأة مهتمة إنها تكدس سبائك الدهب؟ وايه تأثير ده على اسعار الدهب عالميا ؟ وهل الدهب مجرد استثمار ولا استراتيجية عشان يحموا اقتصادهم من الكوارث اللي ممكن تحصل؟.. لو عاوز تعرف اجابة الأسئلة دي كلها شوف التقرير ده للآخر عشان تفهم الحكاية!
في 2023 أوروبا الشرقية دخلت سباق عالمي على شراء الدهب.. و البنوك المركزية هناك شغالة على قدم وساق عشان تزود احتياطياتها من أول التشيك اللي عايزة تضاعف مخزونها لـ100 طن في 3 سنين لحد بولندا اللي بقت أكبر مشترٍ للدهب في العالم في الربع التاني من السنة دي.
السؤال ليه حالة النهم دي على الدهب ؟
رئيس البنك المركزي التشيكي أليس ميشيل، قالها بكل وضوح: "احنا محتاجين نقلل التقلبات." وبالنسبة له، الدهب هو الحل لأنه ما بيتأثرش زي الأسهم والأسواق التانية..و التشيك حالياً بتملك حوالي 150 مليار دولار من الاحتياطيات الأجنبية وعايزين جزء كبير منها يبقى دهب
نفس الكلام ينطبق على بولندا اللي بتشارك حدودها مع أوكرانيا وبتواجه خطر التوترات الجيوسياسية.. محافظ البنك المركزي البولندي مش بس بيشتري دهب ده كمان زود الاحتياطيات لـ420 طن بحلول سبتمبر وهدفه يخلي الدهب يشكل 20% من إجمالي الاحتياطيات
أما المجر وصربيا فهما كمان زودوا مخزونهم بشكل كبير..و البنك المركزي المجري رفع احتياطياته لـ110 أطنان وصربيا ضاعفت احتياطياتها 3 مرات لحد ما وصلت 48 طن
واشمعنا دلوقتي؟
الموضوع مش مجرد استثمار عادي.. الدهب بالنسبة لدول أوروبا الشرقية بقى نوع من الحماية ضد "السيناريوهات الكارثية".. من أول التوترات الجيوسياسية زي الحرب في أوكرانيا لحد المخاوف من حروب تجارية جديدة مع رئاسة محتملة لترامب.. وكمان في نقطة تاريخية مهمة المنطقة دي اتعرضت لحروب كتير في الماضي وعايشة جنب أعنف صراع أوروبي من أيام الحرب العالمية التانية فمش غريب إنهم يشوفوا الدهب كوسيلة للأمان
طب إيه اللي جاي؟
توقعات الأسعار العالمية بتأكد إن الدهب هيكمل مكاسبه مجموعة "جولدمان ساكس" توقعت إن الأسعار توصل لـ3000 دولار للأوقية بنهاية 2025.. وده يخلي رهان أوروبا الشرقية على الدهب مش بس خطوة دفاعية لكن كمان فرصة استثمارية مربحة
طب هو الموضوع سياسة ولا اقتصاد؟
الموضوع مش اقتصاد بس فيه أبعاد سياسية كمان. دول أوروبا الشرقية بتحاول تحافظ على توازن حساس بين الغرب من ناحية وروسيا والصين من ناحية تانية..و امتلاك احتياطيات دهب قوية بيديها نفوذ واستقرارسواء على المستوى المحلي أو في العلاقات الدولية
خلاصة الكلام .. سباق شراء الدهب في أوروبا الشرقية مش مجرد نزوة.. ده تخطيط استراتيجي لمواجهة المخاطر وتحقيق مكاسب اقتصادية وسياسية..و السؤال دلوقتي: هل باقي العالم هيتحرك بنفس السرعة؟ وهل الدهب هيبقى هو اللاعب الرئيسي في حماية الاقتصاد العالمي؟
