وصلت لأكتر من 20 مليار دولار.. شوف أسباب ارتفاعات تحويلات المصريين بالخارج بالبنوك

البنك المركزي أعلن عن رقم مفاجاة بخصوص تحويلات المصريين بالخارج، ياتري تحويلات المصريين بالخارج وصلت لكام حاليا... واية اسباب عودة الارتفاعات الكبيرة في تحويلات المصريين العاملين بالخارج.
 

علي مدار فترة طويلة الاقتصاد المصري عاني بشكل كبير من نقص العملات الأجنبية وخصوصا الدولار، وده بسبب النشاط الغير عادي للسوق السودا في التجارة بالعملات واللي كانت خطر بتهدد الاقتصاد المصري، وكانت كل العملات الأجنبية في السوق المصري رايحة للسوق السودا خصوصا أن سعر البيع فيها كان اعلي بشوية من السعر الرسمي في البنوك.
حالة التخبط اللي كان عليها الاقتصاد المصري واللي استمرت لفترات طويلة لحد ما الحكومة أخذت اكثر من اجراء لاعادة انعاش الاقتصاد المصري وأول الخطوات كانت توقيع صفقة الاستثمار السياحي في راس الحكمة واللي دخلت لمصر 34 مليار دولار بشكل مباشر لخرينة البنك المركزي، ودي كانت اداه للحكومة لتوفير الدولار للموردين والمستوردين علشان يوفروا كل الاحتياجات اللي عايزها السوق المصري، خصوصا أن الموردين والمستوردين كان اداه مهمة للقائمين علي السوق السودا في اللعب بالاسعار ، خصوصا أن الموردين كانوا بيشتروا الدولار من السوق السودا بسعر اعلي من السعر الرسمي في البنوك علشان يوفروا الحاجات اللي بنستوردها من الخارج، وفي اللحظة كانوا بيلموا الدولار من المواطنين بسعر اقل شوية ويرجعوا يبعوا للموردين والمستوردين والناس اللي محتاجه الدولار باعلي سعر، وبالتالي كان عندهم السوق اللي خاصة بيهم في التجارة بالعملات.
طيب اية اللي عملته الحكومة علشان تقضي علي وجود السوق السودا في التجارة بالدولار؟.
بعد ما الحكومة وقعت صفقة الاستثمار السياحي في راس الحكمة، هنا جه القرار المهم واللي اخذته الدولة في بداية شهر مارس من العام الحالي وهو تحرير سعر صرف الدولار بشكل مرن قدام العملات الأجنبية، والقرار ده بينص علي صعود وهبوط سعر صرف العملات الأجنبية بشكل حر في البنوك بدون التقييد بسعر رسمي زي ما كان موجود قبل كده خصوصا أن تقييد سعر الصرف برقم محدد كان السبب الاساسي في وجود سوق سودا في مصر.
بعد القرار ده كل الدولار اللي كان موجود في السوق المصري رجع كله علي البنوك خصوصا الدولار اللي كان موجود في البيوت واللي اغلبه كان جاي من تحويلات المصريين بالخارج واللي الدولة بتعتبرهم في الوقت الحالي مصدر مهم للدخل الدولاري لمصر من الخارج، وحاليا هما رقم واحد بعد تراجع ايرادات قناة السويس بعد الأحداث اللي موجودة في منطقة الشرق الأوسط.
امبارح البنك المركزي أعلن عن قرار مهم وهو زيادة تحويلات المصريين العاملين بالخارج واللي وصلت لـ2.7 مليار دولار  مقابل نحو 1.3 مليار دولار في شهر  سبتمبر اللي فات.
البنك المركزي قال كمان، أن تحويلات المصريين العاملين بالخارج سجلت في الربع الأول من السنة المالية 2024/2025 لشهور يوليو وأغسطس وسبتمبر 8.3 مليار دولار مقابل نحو 4.5 مليار دولار في نفس الفترة من 2023، ووصل معدل تحويلات المصريين في الخارج من بداية 2024 لحد دولوقتي لـ20.8 مليار دولار مقابل نحو 14.6 مليار دولار.