خطة المشاط.. شوف إزاي الحكومة بتجذب الاستثمارات الأجنبية

يا ترى إزاي الحكومة المصرية نجحت في جذب الاستثمارات الأجنبية، وتشجيع المستثمرين على دخول السوق المصري، هل في قرارات وتسهيلات جديدة طلعت وغيرت المعادلة وفتحت شهية المستثمرين ولا مشروعات جديدة فتحت، وإيه اللي بيحصل بالظبط.. هنقولك كل التفاصيل في التقرير  ده فتابعنا للآخر. 
 

في الساعات الأخيرة، الدكتورة رانيا المشاط، وزيرة التخطيط والتنمية الاقتصادية والتعاون الدولي، والمهندس حسن الخطيب، وزير الاستثمار والتجارة الخارجية، عملوا اجتماع مع بعثة البنك الدولي بقيادة  ستيفان جيمبرت، المدير الإقليمي للبنك الدولي بمصر واليمن وجيبوتي والوفد المرافق له، وده كان بمقر وزارة التخطيط والتنمية الاقتصادية والتعاون الدولي في العاصمة الإدارية الجديدة.

واللقاء ده، كان هدفه مناقشة موقف تطوير استراتيجية الاستثمار الأجنبي المباشر في مصر (2025- 2030)، واللي بيتم إعدادها بالتعاون مع مجموعة البنك الدولي، باعتباره أحد أهم شركاء التنمية لمصر، وطبعا كل ده بيحصل تنفيذًا للتوجيهات الرئاسية وقرارات المجلس الأعلى للاستثمار.

عشان كده، أشادت الدكتورة رانيا المشاط، بفرق العمل من البنك الدولي، ووزارتي التخطيط والتنمية الاقتصادية والتعاون الدولي والاستثمار والتجارة الخارجية والهيئة العامة للاستثمار، وبجهودهم في تطوير استراتيجية الاستثمار الأجنبي المباشر لمصر،  وتعزيز التجارة باعتبار الكلام ده من الأهداف الاستراتيجية الكبرى اللي بتسعى الحكومة المصرية لتحقيقها، عشان تعزز بيئة الاستثمار في مصر.

وبالنسبة للجهود اللي بتقوم بها الدولة لتعزيز كفاءة إدارة الاستثمارات العامة، وحوكمتها، فهي وضع سقف مُحدد للاستثمارات بما يحد من معدلات التضخم، وكمان إتاحة المزيد من الفرص للقطاع الخاص، وده بالإضافة للتعاون الفني مع البنك الدولي لإعداد استراتيجية الاستثمار الأجنبي المباشر، والتوجه ده طبعا بيدعمه المجلس الأعلى للاستثمار، واللي وضع رؤية واضحة للاستثمار الأجنبي المباشر في مصر،  بما يساهم في تعزيز جهود الدولة من أجل جذب وتشجيع الاستثمارات الخارجية واللي أصبح ضمن مستهدفات برنامج الحكومة لبناء اقتصاد تنافسي جاذب للاستثمارات، والاستفادة من المقومات الكبيرة للاقتصاد المصري.

وبالنسبة للشركاء الدوليين، فبيتم من خلالهم إعداد التقارير التشخيصية والدراسات اللي بتتضمن توصيات ومحاور تنفّذ على أرض الواقع في مجالات كتيرة، وده بالتأكيد بيدفع جهود التنمية لقدام.

كمان، وزارة الاستثمار دلوقتي بتعمل مجهود جبار عشان تهيء وتوفر مناخ استثماري جاذب ومستقر، وبكده نقدر نحقق قفزات كبيرة من النمو تتناسب مع طموحات الشعب المصري.

عشان كده، الفترة الجاية هيتم فيها الانتهاء من صياغة الخطة الاستراتيجية الاستثمارية، واللي بتتضمن استراتيجية لجذب الاستثمار الأجنبي المباشر، مع التركيز على تحسين بيئة الأعمال وتسهيل الإجراءات، وكل دابيعزز من تنافسية مصر كوجهة رئيسية للاستثمار والتجارة في المنطقة، وكمان بيعكس التزام الحكومة بتوفير فرص استثمارية مستدامة تدعم النمو الاقتصادي.

وأخيرا، نقدر نقول، إن مصر دولة كبيرة وبتمتلك بنية تحتية متطورة ومدن جديدة، وكمان السوق المصري بيتميز بعمالة مدربة ومؤهلة، وده بيأهلنا اننا نكون سوق استهلاكي كبير جدا، وبيتمتع بموقع جغرافي إستراتيجي، يتوسط قارات العالم، وكل ده بيسهل النفاذ إلى أوروبا والشـرق الأوسط وأفريقيا وآسيا، وكمان مصادر الطاقة المتنوعة في مصر بتعتبر عامل جذب مهم جدا للمستثمرين، وكل ده بيساهم في اكتمال خطة جذب الاستثمارات الأجنبية، اللي هنشوفها بنفسنا بترف على مصر في الفترة الجاية.