قرب على المشهد.. هتشوف مصر في حتة تانية

لو متخصص شوية في الاقتصاد والسياسة والأرقام والتحليلات هتعرف حاجات كتير وهتقرب من الصورة كويس جدا وهتعرف مصر رايحة على فين وازاي هتنور في الشهور والسنين الجاية وهتعرف إن كل اللي اتعمل دا عشان بلدنا تفضل قوية وكبيرة ومؤثرة.. لو عاوز تعرف اكتر شوف اقرأ هذا التقرير  للآخر .
 
لو رجعنا كام سنة لورا وتحديدا قبل 10 سنين فاتوا وافتكرنا المشهد كويس وقد ايه كان صعب .. بلد طالعة من أحداث كانت كفيلة توقع اي بلد ومؤامرات وعنف وإرهاب ومجهول مخيف وكلنا كنا قاعدين في البيوت وبنتحسر على البلد اللي كانوا ناوين يبعوها بالحتة ودخلوا فيها المرتزقة وبيتخطط ليها أسوأ مخطط في تاريخها ولو قارنا اللي كان بيحصل وقتها بمصر حاليا هتعرف قد ايه البلد دي محروسة وربنا مش كاتب ليها توقع ابدا لانها رمانة الميزان ولأنها بلد مش بتعرف التآمر وجيشها خير اجناد الارض ولأن أهلها في رباط ليوم الدين.. امكن كلامنا النهاردة مختلف شوية عن كل يوم لكن من باب التذكرة وعشان مننساش كنا فين وبقينا فين ومتخليش حد يقولك أن وضعنا قبل كده كان أفضل لانه حتى لو أحداث يناير محصلتش وفضلت الدولة من غير تخطيط مع الزيادة الرهيبه في عدد السكان كان زمان مصر بتعاني كتير جدا.

طيب ايه اللي اتغير في مصر خلال العشر سنين اللي فاتت ؟
لو فاكرين اول الرئيس السيسي مامسك الحكم صارح الناس ومخباش الحقيقة وقال إن مصر عرت ضهرها وأنها شبه دولة وإن دا لايليق بدولة بدعت الحضارة وكانت في مقدمة الدول وعلمت العالم الحساب والفلك والزراعة والحرف وأساليب الري والكتابة والثقافة والنور وعشان مصر ترجع تنور تاني كانت عاوزة مجهود جبار وسباق مفتوح مع الزمن ودا التحدي اللي دخله السيسي عشان يبني دولة نتفاخر بيها دلوقتي رغم الصعاب الموجودة وبدأ بالبنية التحتية في كل القطاعات والدولة صرفت اكتر من 10 تريليون جنيه عشان تتأسس صح ويبقي عندها طرق ومحاور ومواني وكهرباء وطاقة وسكة حديد ومناطق صناعية وزراعة ومناخ جاذب للاستثمار .

شفنا ازاي مصر قفزت 100 مركز  مرة واحدة في مؤشر جودة الطرق وبقت في المركز ال18 عالمياً اكيد حضرتك متخيل حجم الشغل اللي اتعمل عشان نوصل للمركز دا وفي الكهرباء كلنا فاكرين كانت عاملة أزاي وكانت بتقطع اكتر ما بتيجي وكان الحل اللي طرحته حكومة الخيبة وقتها أن الناس تلبس من قطونيل والنهاردة مصر بتصدر الكهرباء للخارج وعندها اضخم مشروع طاقة كهربائية نووية بيتعمل في الضبعة ولو هتقولي الكهرباء كانت بتقطع في الصيف اللي فات هقول لحضرتك دي كانت مشكلة غاز مش مشكلة محطات الكهرباء واللي بتنتج في العادي طاقة كهربائية بزيادة تسمح بالتصدير ولو روحنا للمواني هتعرف قد ايه التطوير اللي حصل فيها وازاي بقت موانئ عالمية على المتوسط والبحر الأحمر.

في مجال الاستثمار مش محتاجين نتكلم كتير وكفاية تعرف إن مصر اتصدرت دول قارة أفريقيا كلها في حجم الاستثمارات وازاي مصر بقت قبلة للاستثمارات الضخمة في الساحل الشمالي وفي منطقة اقتصادية قناة السويس وغيرها من المناطق ولو على الصناعة فكلنا شايفين اللي بيحصل عشان الدولة توطن الصناعات في كل المجالات وكان آخرها امبارح بافتتاح قلاع صناعية ضخمة كان الإهمال قفلها وهي قلعة النصر للسيارات ودا غير ملايين الأفدنة اللي تم إضافتها ولسه هيتم إضافتها للرقعة الزراعية عشان مصر تأمن أكلها .

كل اللي قلناه دا كانت نماذج لتنمية ضخمة بتم في مصر الجديدة وكشفت ملامح الجمهورية الحديثة اللي هتبقي عليها مصر ودا اللي خلى كبرى المؤسسات المالية الدولية تتوقع أن مصر هتكون من اقوى الاقتصاديات في المنطقة بحلول سنين قليلة وأزاي هتكون وحش اقتصادي في العالم.