موسم الهجوم على مصر.. هل فعلا الاقتصاد بينهار والبنوك هتفلس؟
عمرك فكرت في الشائعات اللي بنسمعها كل يوم عن الاقتصاد المصري؟ تفتكر مين بيطلّع الكلام ده؟ وبسطلعه ليه؟ وهل فعلاً الوضع الاقتصادي في مصر صعب زي ما بيتقال، ولا في حكاية تانية؟
كل يوم تقريباً بنسمع إشاعات.. الجنيه هيقع.. الاستثمارات بتهرب، ومصر هتفلس!
كلام كبير.. وكل ما الناس تتكلم الحكاية تكبر والمشكلة إن الشائعة بتكبر أسرع من الحقيقة. بس بقى خلينا نفكر شوية.. ليه الشائعات دي بتستهدف مصر تحديداً؟ ليه الحكاية مابتخلصش؟ مين المستفيد من كده؟
تفتكروا الموضوع كله صدفة؟ ولا ممكن يكون وراها حد؟
بص يا سيدي.. الشائعات اللي بتمس الاقتصاد هي أخطر أنواع الشائعات، ليه؟
لأنها بتضرب في ثقة الناس.. الثقة اللي هي أساس أي اقتصاد في العالم… لما الثقة دي تهتز، الناس بتتردد في أي قرار.. المستثمر يتردد قبل ما يحط فلوسه المواطن يوقف أي خطوة كبيرة زي شراء بيت أو عربية واللي بيروج الشائعات دي بيلعب على الخوف.. وبيغذي التوتر
حد ممكن يسأل ويقول .. واشمعنا يعني بيستهدفوا مصر؟
مصر بلد ليها وزن كبير في المنطقة.. واستقرارها بيأثر في محيطها العربي والإفريقي كمان. غير إن اقتصادها بيمثل قوة كبيرة وبتزيد مع مشاريع البنية التحتية الضخمة اللي شغالين عليها.. قناة السويس الجديدة، العاصمة الإدارية، المدن الصناعية، الشبكة العملاقة من الطرق والكباري اللي بتربط كل المحافظات.. كل ده بيدي رسالة إن مصر عندها رؤية للمستقبل، وده طبعاً مش عاجب ناس كتير
طب تفتكر مين اللي ممكن يستفيد من الكلام ده؟
فيه جهات للأسف مش بتحب تشوف مصر قوية، لأن القوة بتديك استقلال في القرار واللي معتمد على نفسه بيبقى عنده حرية أكبر.. فلو نجحت مصر في بناء اقتصاد قوي ومستقر هيبقى عندها نفوذ إقليمي أكتر وصوت مسموع أكتر.. وفيه دول في المنطقة مش مبسوطين من السيناريو ده، وبيحاولوا عن طريق الإعلام ومواقع التواصل إنهم يخلقوا صورة سوداوية عن الوضع
تخيل كده لما تيجي تقول إن الاقتصاد المصري قرب ينهار.. طب اللي هيشوف أو يسمع الكلام ده هيخاف، المستثمر مش هيجي، والأجنبي اللي بيفكر يزور مصر كسائح هيتردد.. حتى المواطن العادي اللي كان ناوي يستثمر فلوسه في مشروع صغير ممكن يقف.. دي بقى الحيلة
طب بعيد عن الشائعات والى بيروجوها ايه حقيقة الوضع الاقتصادي فى مصر؟
"الحقيقة إن الاقتصاد المصري ماشي بخطة ثابتة.. آه التحديات موجودة زي أي اقتصاد بس الاقتصاد فعلاً حقق أرقام وإيجابيات. معدل النمو في الناتج المحلي، وارتفاع الصادرات، والإصلاحات في الطاقة والزراعة، كله ده حصل. وحتى أزمة كورونا والأزمات الاقتصادية العالمية مصر عارفة تتعامل معاها
الخلاصة متصدقش كل حاجة تسمعها.. الشائعات هدفها تضرب في الثقة لكن الحقيقة موجودة.. امسك أي تقرير اقتصادي محايد، هتلاقي إن الوضع مش بالسوء اللي بيحاولوا يصوروه. مصر ماشية في طريق تطوير حقيقي، آه الطريق طويل، بس اللي متأكدين منه إن الشائعات دي مش هتوقف بلد عندها حلم وبتحقق فيه
وأخيرا .. لما تسمع شائعة، فكر مرتين.. اسأل نفسك: مين ورا الكلام ده؟ وليه؟"
