مشروع السيسي اللي هيأمن احتياجات مصر وهيغنيها عن الاستيراد
يا ترى إيه هو مشروع المليون ونص مليون فدان اللي شغال عليه الرئيس عبد الفتاح السيسي؟ وإزاي المشروع ده بيلعب دور مهم في تأمين غذاء المصريين خصوصًا مع الظروف العالمية الصعبة والتحديات اللي بنشوفها في استيراد الأكل والغذاء؟ خلينا نحكيلك أكتر في الرحلة دي عن واحد من أضخم المشاريع القومية اللي شغالة في بلدنا دلوقتي، مشروع هيغير مستقبل الزراعة في مصر تمامًا.
خلونا نبدأ كده نفكركم سوا بمشروع المليون ونصف مليون فدان. المشروع ده أُطلق بهدف أساسي وهو زيادة المساحة الزراعية في مصر وتطوير قطاع الزراعة. لكن اللي يهمنا فعلاً نفهمه هو ليه المشروع ده مهم؟ وليه دلوقتي بالذات؟
في الأول خلونا نفكر في حجم التحديات اللي بتواجهها مصر. عدد السكان اللي بيزيد بسرعة وده بيزود الطلب على الغذاء بشكل كبير.. في المقابل عندنا أراضي زراعية محدودة وأغلبها بقى مرهق ومحتاج تجديد علشان يقدر يدي إنتاجية عالية.. كمان زيادة تكلفة الاستيراد والأسعار العالمية بقت بتمثل ضغط على الاقتصاد المصري وعلى جيب المواطن
طيب، ليه المشروع ده يعتبر من الحلول الرئيسية للمشكلة دي؟
أولاً.. مشروع المليون ونص مليون فدان بيهدف لزيادة الإنتاج المحلي من الأغذية بشكل مباشر.. يعني إحنا بنتكلم عن مشروع هيضيف للبلد مساحات زراعية جديدة تُقدر بمليون ونص مليون فدان، ده مش رقم قليل! تخيل كل الفدادين دي متوزعة في مناطق مختلفة من مصر زي الوادي الجديد، والمغرة، وتوشكى، وغيرها.. الأراضي دي كمان مش مجرد أراضي دي مناطق اتجهزت وتعملت فيها بنية تحتية حديثة زي آبار المياه، وشبكات الري الحديث اللي بتوفر مياه كتير وبتساعد الفلاحين على زراعة محاصيل بكفاءة عالية
ثانيًا.. المشروع ده بيحقق نوع من الأمان الغذائي. تخيل إنك تقدر تنتج محاصيل أساسية زي القمح، والذرة، والخضراوات، والفواكه محليًا، وده معناه تقليل الاعتماد على الاستيراد وتوفير العملة الصعبة اللي بنصرفها على الغذاء من برة… يعني ببساطة، لو في أزمة عالمية في الغذاء أو في ارتفاع جنوني في الأسعار، مشروع المليون ونص مليون فدان هيكون واحد من السندات اللي نعتمد عليها
تالت حاجة.. المشروع ده كمان بيوفر فرص عمل جديدة للشباب… تخيل عدد العمالة اللي هتحتاجها الأراضي الجديدة دي، من المهندسين الزراعيين، والفنيين، والعمال، وحتى الصناعات المساندة زي التعبئة والتغليف، والنقل. يعني مش بس المشروع ده بيأمن غذاء المصريين، لكن كمان بيفتح باب رزق جديد للشباب.
وبعدين المشروع مش متوقف عند الزراعة بس، لا، في خطط إن الأراضي دي تبقى مناطق متكاملة تضم أنشطة زراعية، وصناعية، وتعبئة، وتصدير، وده يخليها مناطق اقتصادية متكاملة تقدر تنافس في السوق المحلي والعالمي
وخلينا كمان نقولك على آخر التطورات في المشروع؟.. لحد دلوقتي الدولة فعلاً انتهت من تجهيز مساحات كبيرة من الأراضي وفي محاصيل اتزرعت وبدأت تنتج وتدخل السوق.. مش بس كده، ده في خطط كمان لاستخدام الطاقة الشمسية لتشغيل الآبار وتقليل استهلاك الكهرباء والمياه، يعني المشروع بيتبنى أحدث تكنولوجيا في الزراعة المستدامة واللي بتخدم البيئة وتقلل التكلفة
وفي خطوة مهمة كمان، المشروع مش شغال لوحده، في شراكات مع شركات عالمية وخبراء زراعة علشان يضمنوا إن الإنتاجية عالية والجودة متميزة، وده هيفتح لمصر فرص تصدير لأسواق جديدة ويخلي المنتج المصري منافس قوي برة
كل ده مش بس بيأمن غذاءنا، ده كمان بيبني مستقبل لأولادنا، وبيخلينا دايمًا فخورين بمصر اللي بتقدر تطلع لقدام وتحقق مشاريع قومية تخدم كل مصري
