زيارة خاصة.. مفاجأة الاستثمارات التركية اللي جاية مصر قريب

يا ترى إيه قصة الاستثمارات التركية اللي جاية السوق المصري قريب، وإيه شكلها، وليه تركيا بتحاول دلوقتي تعزز استثماراتها في السوق المصري وإيه هي حجمها وشكلها.. هنقولك كل التفاصيل في التقرير ده فتابعنا للآخر.

في الساعات الأخيرة، وزير الاستثمار والتجارة الخارجية، المهندس حسن الخطيب، زار تركيا والتقى عدد من المسؤولين ورجال الأعمال وأصحاب الشركات، وخاصة اللي شغالين في مجالات السيارات والأغذية والطاقة الجديدة والمتجددة وقطاعات التجزئة، وبحث معاهم الفرص الاستثمارية في مصر.

ومن هنا، قال وزير الاستثمار إن الحكومة المصرية خلال دلوقتي مهتمة جدا برجال الأعمال والمستثمرين، وبتقدم لهم كل التسهيلات الممكنة وتبذل مجهود كبير في إزالة كل العراقيل اللي بتقف قدامهم.

وكلام الوزير طبعا هدفه جذب المزيد من الاستثمارات التركية إلى السوق المصري، لأن مصر عندها موقع جغرافي مهم قادر على جذب الاستثمارات في مختلف المجالات، وبكده نقدر نقول إن الدولة بتشجع المستثمرين الأتراك على توسيع مشروعاتهم في مصر، باعتبارها بوابة الدخول إلى الأسواق الأفريقية.

وشرح الوزير كمان مزايا السوق المصري، واللي هو بيتمتع بمميزات ومقومات كبيرة، أولها توافر العمالة المدربة والمؤهلة لمواكبة سوق العمل العالمي وبأجور تنافسية، وكمان الكوادر الهندسية المتميزة، بجانب ارتباط مصر بالعديد من الاتفاقيات التجارية الدولية مع عدد كبير من الدول والتجمعات الاقتصادية الرئيسية في العالم، ودي كلها بتعتبر مؤشرات نجاح أي مسثتمر أو رجل أعمال هيضخ فلوسه في السوق المصري.

ومن نتائج الاجتماع ده، إن في شركة تركية أعلنت عن اعتزامها ضخ 160 مليون دولار لإنشاء مصنع للملابس الجاهزة بمدينة العاشر من رمضان، كمان بتدرس شركة تانية إنشاء مصنع للأثاث في المنطقة الحرة في دمياط باستثمارات بتقدر بنحو 200 مليون دولار.

غير كل ده، في فرص استثمارية كتيرة في مصر خاصة في مجال إنشاء المطارات، وكمان القطاع الصحي بالشراكة مع الحكومة، بجانب وجود فرص التعاون للدخول في مشروعات مشتركة في القارة الإفريقية.

كمان، وزير الاستثمار خلال زيارته لتركيا، التقى اتحاد مصنعي السيارات واتحاد الصناعات المغذية التركية، وقدم لها  الفرص المتميزة للاستثمار في قطاع صناعة السيارات، ومحفزات الحكومة للصناع خلال الفترة الجاية، ومتوقع جدا إن كبريات الشركات التركية تضخ فلوسها قريب في مصر، وتم الاتفاق على ترتيب زيارة لوفد الشركة إلى مصر خلال الفترة القادمة لبحث الفرص والمقومات الاستثمارية في السوق المصري.

مش بس كده، ده في شركة تركية كبيرة في قطاع التجزئة، ناوية توسع استثماراتها في مصر، وبتستهدف زيادة فروعها الحالية من 400 إلى 1000 فرع خلال السنتين الجايين.

كل ده كلام جميل جدا، وبيؤكد إن تركيا ناوية تزود استثماراتها في مصر وتعزز وجودها في السوق، عشان تحقق أكبر مكاسب لها سواء من السوق المصري أو السوق الأفريقي.