استثمارات ضخمة من الخليج ودول بريكس.. مصر هتروح في حتة تانية خالص

يا ترى إيه سر الحراك الاستثماري الكبير اللي بتحاول مصر تعمله دلوقتي؟و ليه دول زي السعودية والصين وتركيا أصبحت على خريطة زيارات الوفود المصرية؟ وهل فعلاً هتشوف استثمارات ضخمة داخل مصر قريب؟ وده هيأثر إزاي على الاقتصاد المصري؟ ويعني إيه إننا ندخل سوق جديد أو نستقطب استثمار من تجمع زي الـ"بريكس"؟

فى الفترة الأخيرة مصر بتاخد خطوة مهمة في مجال الاستثمار وده من خلال جهود كبيرة للتوسع والترويج للاستثمار داخل مصر…وحاليا مصر بتطرق أبواب دول زي دول "بريكس" والخليج بهدف جذب استثمارات جديدة وتقوية التعاون التجاري

طب إيه اللي بيحصل فعلاً ووراه إيه؟

مصر شايفة إن السوق العالمي دلوقتي فيه فرص حقيقية لو اتخطط ليها صح.. زي ما بيقول المدير التنفيذي لجمعية رجال الأعمال المصريين محمد يوسف إن الجمعية شغالة على تنظيم بعثات ترويجية لدول "بريكس" زي الصين والهند، ولبعض دول الخليج زي السعودية وده هيبدأ مطلع 2025و الهدف الأساسي هو جذب مستثمرين من الدول دي لاستكشاف الفرص اللي عندنا في مصر

الفكرة هنا إن مصر بتستفيد من علاقات قوية مع الدول دي وبتسعى لفتح الباب قدام المستثمرين عشان يشوفوا فرص جديدة في مجالات زي التكنولوجيا والطاقة المتجددة والذكاء الاصطناعي وغيرها كتير.. وده هيساعدنا نزود حجم التبادل التجاري ونفتح أسواق جديدة للصادرات المصرية

وخلال الأسبوع الجاي وفد مصري بيضم حوالي 35 شركة هيشارك في ملتقى مصري-سعودي ومعرض سيتي سكيب اللي هتستضيفه السعودية.. والمملكة بتشهد نهضة عمرانية ضخمة وده بيخليها سوق واعد لشركات المقاولات والتطوير العقاري المصرية.. و وجود الشركات المصرية هناك هيخلق فرص كبيرة للشركات والمصانع المصرية اللي بتصدر منتجات للسوق السعودي

والحقيقة إن مصر عندها حضور فعلي كبير في السعودية مع حوالي 5700 شركة مصرية شغالة هناك ووزارة الاستثمار السعودية منحت 950 ترخيص جديد لشركات مصرية بس في الربع الأول من السنة دي بنسبة حوالي 30% من إجمالي التراخيص اللي صدرت في الفترة دي… يعني في تطور ملحوظ واهتمام متبادل والمهم دلوقتي هو الاستفادة من التواجد ده عشان ندعم العلاقات الاقتصادية ونفتح فرص استثمارية جديدة

طب هل فيه خطط لأسواق تانية ؟

غير السوق السعودي جمعية رجال الأعمال المصريين بالتعاون مع مجلس الأعمال المصري التركي بتخطط لبعثة تجارية لتركيا في ديسمبر الجاي..و الهدف من الزيارة هو بحث فرص جديدة لزيادة الاستثمارات المشتركة وتحديد القطاعات اللي ممكن تزيد فيها التعاون زي الصناعة وتكنولوجيا المعلومات.. يعني مصر بتسعى تبني شبكات تعاون أوسع تضمن استقرار في استثماراتها وتعزز التعاون التجاري مع دول عندها سوق كبير زي تركيا.

والجمعية المصرية لرجال الأعمال بدأت تتواصل مع جمعيات أعمال في الصين، وسنغافورة، وكوريا الجنوبية، وبلغاريا، وليتوانيا، عشان تجذب وفود استثمارية لمصر.. والهدف هنا هو إن مصر تكون عندها شبكة استثمارات أوسع في مجالات مختلفة خاصةً تصنيع السلع الوسيطة وتكنولوجيا المعلومات والطاقة الجديدة والذكاء الاصطناعي..و الفترة الجاية هتشهد محاولات لاستقطاب استثمارات في مجالات متنوعة وده شيء مهم لأن التنوع في الاستثمارات بيدعم الاقتصاد المصري في كل الأوقات وبيقلل من تأثير الأزمات الاقتصادية العالمية

ومصر فعلياً حققت إنجازات كبيرة في جذب الاستثمارات الأجنبية.. وفقا لبيانات البنك المركزي فالاستثمارات الأجنبية وصلت لأرقام ضخمة  بنهاية السنة المالية 2023-2024، بدفع من أكبر صفقة استثمار في تاريخ مصر وهي تنمية مدينة رأس الحكمة بالشراكة مع القابضة الإماراتيةظ.. وده بيدل إن مصر عندها فرص واعدة بتجذب أنظار المستثمرين

والهدف دلوقتي هو الوصول لاستثمارات أجنبية بقيمة 15 مليار دولار في السنة المالية الحالية.. زي ما أعلن حسام هيبة، الرئيس التنفيذي للهيئة العامة للاستثمار والمناطق الحرة.. وده بيأكد إن في خطط قوية وإن الدولة مركزة على الاستثمار كوسيلة لتقوية الاقتصاد.

كل اللى نقدر نقولوا ان مصر ماشية بخطوات سريعة عشان تفتح أسواق جديدة وتستقطب استثمارات أجنبية في مجالات حيوية.. يا ترى الخطط دي هتنجح وهنشوف نتائج ملموسة قريب؟ وهل ده هيحسن من الوضع الاقتصادي بشكل عام؟ ده اللى هنعرفوا الايام الجاية