مش هنسيب الناس ولا هنحمل عليهم تاني.. رسائل السيسي لصندوق النقد الدولي
ليه الرئيس السيسي بيأكد على تخفيف الضغوط عن الناس؟ وإزاي التعاون مع صندوق النقد الدولي ممكن يساعد مصر في تخطي الأزمة الاقتصادية؟ هل فعلاً فيه نية إن الدولة تخفف الأعباء وتحقق استقرار اقتصادي؟
من ساعات الرئيس عبد الفتاح السيسي قابل مديرة صندوق النقد الدولي "كريستالينا چورچييفا"اللى بتزور مصر حاليا للتباحث حوالين برنامج مصر مع الصندوق.. اتكلم السيسي بوضوح عن أولوية الحكومة في تخفيف العبء عن المواطنين خصوصا في ظل الظروف الاقتصادية الصعبة اللي العالم كله بيمر بيها، وكان عنده رسائل قوية ومباشرة لصندوق النقد بضرورة مراعاة الظروف الاقتصادية اللي بتمر بيها مصر.
الرئيس السيسي كان واضح في لقاؤه مع مديرة صندوق النقد الدولي لما قال: "مش هنسيب الناس ولا هنحمل عليهم تاني". .الرسالة دي بتعكس توجه الدولة بإنها مش بس تلتزم بتنفيذ برنامج الإصلاح الاقتصادي المتفق عليه مع صندوق النقد لكن كمان بتحاول تضمن إن البرنامج ده يكون متوازن ويراعي الظروف الصعبة اللي بيعيشها المواطن المصري.
الاجتماع اللي حضره رئيس الوزراء مصطفى مدبولي ومحافظ البنك المركزي حسن عبد الله والدكتورة رانيا المشاط، وأحمد كوجك وزير المالية كان هدفه الأساسي هو مناقشة إزاي نكمل برنامج الإصلاح من غير ما نثقل على كاهل الناس
السيسي أكد إنه عايز يكمل التعاون مع صندوق النقد لكنه كمان طلب إن الصندوق يراعي التحديات اللي بتواجه مصر بسبب الأزمات الدولية اللي أثرت على الموارد الدولارية للبلد وعلى إيرادات الدولة.. وده معناه إن الدولة مش هتتعامل مع الإصلاحات الاقتصادية على إنها أرقام ومؤشرات مالية وبس بل هتراعي التغيرات الإقليمية والتحديات اللي بتضغط على الاقتصاد المحلي
و من أهم النقاط اللي اتناقشت في الاجتماع كانت التضخم اللي بيأثر بشكل مباشر على معيشة الناس.. وده خلي الرئيس يشدد على إن الأولوية حالياً هي مكافحة التضخم والسيطرة على الأسعار.. ومن هنا جت مطالبة السيسي لصندوق النقد إنه يساعد في الوصول لسياسات تحمي الاقتصاد المحلي من غير ما تزود المعاناة على الناس
من ناحيتها كريستالينا چورچييفا مديرة صندوق النقد الدولي اتفقت تماماً مع رؤية الرئيس وقالت إن الصندوق فاهم حجم التحديات الكبيرة اللي بتمر بيها مصر وإنهم بيسعوا للتوصل لأفضل حلول الإصلاح الاقتصادي بالشراكة مع الحكومة المصرية علشان يحققوا نمو اقتصادي قوي ومستدام من غير ما يزودوا الأعباء على الناس
طب ايه الحاجات التانية اللى الرئيس اتكلم عنها؟
واحد من المحاور المهمة اللي اتكلم عنها الرئيس السيسي كان دعم القطاع الخاص وجذب الاستثمارات لأن ده هو اللي هيساعد في خلق فرص عمل جديدة وتحسين معدلات النمو الاقتصادي.. الرئيس شاف إن الحل مش بس في الإجراءات المالية والنقدية لكن كمان في تشجيع القطاع الخاص علشان يكون المحرك الأساسي للاقتصاد ويكون قادر على تحمل جزء من أعباء التنمية
مديرة صندوق النقد أثنت على جهود الدولة المصرية في تنفيذ برنامج الإصلاح الاقتصادي وأشارت الى إن النتائج اللي اتحققت حتى الآن كانت إيجابية وإنه رغم التحديات الكبيرة مصر قدرت تحافظ على مؤشرات الاقتصاد الكلي بشكل مستقر..و ده خلا مؤسسات التصنيف الائتماني الدولية ترفع تصنيف مصر الائتماني وتزيد من الاستثمارات الأجنبية اللي داخلة البلد.
فى نهاية الاجتماع السيسي أبدى تطلعه لاستمرار التعاون مع صندوق النقد بهدف تعزيز الاستقرار الاقتصادي وخفض معدلات التضخم وفي نفس الوقت الحفاظ على الإنجازات اللي اتحققت في الفترة الأخيرة خصوصاً على مستوى دعم الفئات الأكتر احتياجاً.. ومع ده كله كانت رسالة السيسي واضحة وهي إن مصر ملتزمة بالإصلاح، لكن على طريقتها وبما يتماشى مع مصلحة المواطن في المقام الأول
