تجارة بـ14 مليار دولار... حكاية سوق الكوميسا

مصر حاليا فتحت حوار مفتوح وخطوط تجارة مع كل دول العالم، وفعلا بشاير الشغل ده بدأت تظهر، بس المرة دي الربط هيكون في منطقة جديدة، وهيا دول الكوميسا.. ياتري إيه اللي بتعمله مصر علشان تزود تجارتها مع دول الكوميسا .. ومصر بتستهدف كام من التجارة مع الدول دي

طلعنا هنا لحضراتكم اكتر من مرة ووضحنا أن مصر حاليا بدأت مرحلة جديدة من الانفتاح التجاري مع كل دول العالم وده في اطار توجيهات القيادة السياسية بزيادة التصدير وخفض الاستيراد والعمل علي اعادة توازن الميزان التجاري لمصر مرة تانية خصوصا أن كان رايح بنسبة كبيرة جدا في ناحية الاستيراد وكان بيكلف مصر مبالغ دولارية كبيرة جدا علشان يوفر الحاجات اللي السوق المصري محتاجها.
طيب اية اللي بتعمله مصر حاليا في مجال التجارة وتشجيع الاستثمارات؟.
الحكومة حاليا فاتحة خطوط اتصال وترويج عالمي للاجراءات اللي قامت بيها الحكومة علي مدار الفترة اللي فاتت لتذليل عقبات الاستثمار، وتشجيع المستثمرين علي النزول لمصر واقامة مشروعات استثمارية واللي هيكون انتاجها لتغطية الاستهلاك المحلي وتصدير الفائض للخارج.
واحد من ضمن خطوط الاتصال اللي الحكومة فتحتها كانت مع دول منظمة الكوميسا واللي بتضم 21 دولة وهيا في عضويتها 21 دولة وبتضم دول بوروندي وجزر القمر والكونغو الديمقراطية وجيبوتي وإريتريا وإسواتيني وإثيوبيا وكينيا وليبيا ومدغشقر وملاوي وموريشيوس ورواندا وسيشل والصومال والسودان وتونس وأوغندا وزامبيا وزيمبابوي.

في اليومين اللي فاتوا وزير الاستثمار والتجارة الخارجية حسن الخطيب كان مشارك في اجتماعات قمة الكوميسا الـ23 واللي كانت مقامة في بوروندي، واتكلم عن الاجراءات اللي قامت بيها مصر علشان تزيل كل القيود الجمركية وغير الجمركية اللي بتأثر على حركة التجارة البنية بين الدول الأعضاء في المنظمة واللي وصلت قيمتها لـ 14 مليار دولار في 2023 خصوصا أن اسواق المنظمة دي هيا اسواق واعدة للصادرات المصرية .

وزير الاستثمار والتجارة الداخلية اتكلم كمان علي اتفاقية منطقة التجارة الحرة الثلاثية، واللي دخلت حيز النفاذ في يونيو 2024 ، خصوصا أن مصر هيا أكبر دولة مستحوذة على التجارة البنية في اقيلم الكوميسا وبتساهم باكثر من 30% من حجم التجارة البنية للمظمة.
طيب الصادرات المصرية لدول الكوميسا وصلت لكام؟.
صادرات المصرية إلى دول السوق المشتركة للكوميسا ارتفعت بشكل كبير في الفترة اللي فاتت ووصلت لـ 3.544 مليار دولار في 2022، ةالصادرات المصرية تركزت في خمس دول أفريقية، واللي استحوذوا على 84.8% من إجمالي صادرات مصر لدول المنظمة وفقا لبيانات الجهاز المركزي للتعبئة والاحصاء.
الجهاز المركزي للتعبئة والاحصاء قال أن ليبيا هيا أكثر دولة بتستورد منتجات مصرية ووصلت قيمة الصادرات المصرية هناك لـ 1.215 مليار دولار وبعدها السودان واللي جت في المرتبة الثانية بإجمالي صادرات بلغت 929 مليون دولار، وفي المرتبة الثالثة دولة كينيا واللي الصادرات المصرية لها وصلت لـ 356 مليون دولار، وبعدهم تونس واللي وصلت قيمة الصادرات المصرية لها لـ 306 مليون دولار، واخيرا جيبوتي واللي الصادرات المصرية لها وصلت لـ 173 مليون دولار.