هيوصل لـ5000 جنيه.. اية اللي هيحصل في أسعار الدهب في يناير اللي جاي
الدهب كل يوم في الطالع وسعرها حاليا وصل لأرقام قياسية موصلش لها من الفترة اللي كانت قبل قرارات الاصلاح الاقتصادي واللي كانت في شهر مارس اللي فات.. لكن سعر الدهب هيوصل لرقم خيالي في شهر يناير اللي جاي.. يا تري اية السبب في ده واشمعني شهر يناير بالذات.
الدهب خلال شهر اكتوبر الحالي حقق مكاسب كبيرة وصلت لأكتر من 150 جنيه للجرام 21 واللي هو الاكتر مبيعا في مصر وخصوصا في القري والمحافظات وعليه اقبال كبير جدا من الناس في عمليات البيع والشراء.
التخوفات اللي كانت موجودة عند الناس في الفترة اللي فاتت بسبب الاخبار اللي كانت متداولة بشكل كبير عن وجود قرار من البنك المركزي بتخفيض سعر الفايدة علي الايداع والاقتراض، خلي في اقبال كبير قوي من الناس علي شراء المعدن النفيس، وده خلي محلات الصاغة ترفع الاسعار بشكل كبير وكان سعر الدهب بيتغير أكتر من مرة في اليوم، وطبعا كل مرة كانت بارتفاع جديد في الاسعار .
الغريب ان بعد ما البنك المركزي أعلن عن تثبيت سعر الفايدة لإيداع والإقراض لليلة واحدة وسعر العملية الرئيسية للبنك المركزي عند 27.25% و28.25% و27.75% على الترتيب لكن برضوا اسعار الدهب لسه ما زالت مرتفعة وكمان بتزيد يوم عن اللي قبله، وده كان عكس التوقعات اللي اكدت أن اسعار الدهب هترجع تنخفض تاني بعد قرار البنك المركزي بتثبيت اسعار الفايدة.
طيب ليه اسعار الدهب لسه مرتفعة ومكملة ارتفاع في مصر ؟.
الحقيقة في اكتر من سبب لاستمرار ارتفاع اسعار الدهب في مصر، أولهم التوقعات اللي بتاكد أن الاجتماع اللي جاي للجنة السياسات النقدية في البنك المركزي واللي هيكون مع بداية 2025 هيصدر فيه قرار بتحفيض اسعار الفايدة، واللي اللجنة اخذت قرار بتثبيت اسعار الفايدة في اليومين اللي فاتوا علشان يحافظوا علي الاستثمارات الأجنبية اللي موجودة في مصر وكمان علشان يعالجوا التضخم وميحصلش غلاء جديدة في الاسعار.
من السبب ده في ناس فضلوا من دلوقتي وبدون المخاطرة وقرروا يسحبوا فلوسهم من البنوك ويستثمروها في الذهب لأنهم عارفين أن الذهب هو زينة وخزينة وطول عمره كسبان ومفيش حد راهن علي الدهب وخسر.
السبب التاني اللي هيخلي اسعار الدهب ترتفع بارقام جنونية في مصر وتحديدا في شهر يناير اللي جاي هو انتهاء مدة شهادات الـ27%، ومع التوقعات اللي بتاكد أن لجنة السياسات النقدية هتاخد قرار بخفض اسعار الفايدة هيكون فيه اقبال كبير علي شراء الذهب وبالتالي الاسعار هترتفع بشكل كبير وسعره هيقترب من 5000 جنيه للدهب عيار 21 واللي هو بيحظي باقبال كبير من المواطنين لشراءه، وده في ظل حالة التوترات الموجودة حاليا في منطقة الشرق الاوسط واللي كانت واحدة من الاسباب الرئيسية في ارتفاع اسعار الدهب والطاقة عالميا .
